Nú fáa vit tríggjar hvalvágir afturat tí Føroyum.
Høgni Hoydal, sum umsitur grindaviðurskifti í landsstýrinum arbeiðir nú við at broyta kunngerðina um grind og í tí sambandi verða trý pláss afturat fyribils góðkend sum halvág. Og gongst sum ætlað, verður kunngerðin lýst í august.
Norðoyingar fáa eina hvalvág afturat, tí nú er mølin ímillum Flesjar og Hellisenda á Borðoyarvík fyribils góðkend sum hvalvág.
Í Eysturoy verður sandurin í Skálabotni eisini góðkendur, og somuleiðis kann grind nú eisini haldast til á Lygnnesi í Kollafirði.
Serliga hava eysturoyingar roynt at fáa Skálabotn góðkenda sum hvalvág, men tað hevur gingið strilti, tí mett varð, at grind, sum var dripin har, var ikki mannaføði, tí spillvatn rann í fjørðin.
Heri Petersen sigur, at tað var 9. august í 2010, at hann sendi Fiskimálaráðnum umsókn um at góðkenna Skálabotn sum hvalvág.
- Hettar er ein gamal barnadreymur hjá mær sum nú sær út til at blíva veruleiki sigur hann í stuttari viðmerking.
Áður vóru 23 hvalvágir kring um í landinum, og tær eru:
Norðoyar:
a) Klaksvík, á sandinum niðan fyri Víkarnar.
b) Viðvík, á sandinum.
c) Hvannasund.
Eysturoy:
a) Fuglafjørður, á sandinum.
b) Funningsfjørður, inni í ósanum.
c) Syðrugøta.
d) Norðragøta, á vestara arminum niðan fyri kirkjugarðin og á sandinum norðanfyri.
e) Norðskála, í Møðstøðukrókinum ímillum Stórá og Garðsenda og undir kirkjuni
Streymoy:
a) Tórshavn, Sandágerð.
b) Leynar, á sandinum.
c) Vestmanna, á Fitjasandinum.
d) Hvalvík, um Oyrarnar nærri Streymneslandinum.
e) Tjørnuvík, á sandinum
Vágoy:
a) Miðvágur, á sandinum.
b) Bøur, á sandinum.
c) Sandavágur, á sandinum.
Sandoy
a) Sandur, á sandinum.
b) Húsavík, á sandinum.
Suðuroy:
a) Øravík, á sandinum.
b) Trongisvágur, á sandinum.
c) Hvalba, Lítlabergssandur, í Nesi, og Hvalbiarsandur
d) Vágur
e) Fámjin.
Og nú eru sostatt tríggjar komnar afturat, ein í Borðoy, ein í Eysturoy og ein í Streymoy.
