Nú er skrivara­borðið ruddað

Síðsta umfar í næstbestu fót­bólts­deildini verður klokkan 13 leygar­dagin. Aganevndin hjá FSF gjørdi í fyrradagin niður­støður í tveimum kærum um dystir í 1. deild, og harvið er tað greitt, at endaliga úrslitið av kapp­ingini í 1. deild verður stað­fest seinnapartin leygar­dagin.
Svarið upp á spurningin um, hvat lið skal flyta upp saman við FC Suðuroy, hevur verið tengt at, hvussu tað fór at verða við kæruni hjá TB. Tvøramenn taptu í triði síðsta umfari 2-1 í Gundadali ímóti teimum næst­bestu hjá HB. TB kærdi síð­ani um, at tríggir spælarar høvdu verið á HB liðnum, sum ikki høvdu loyvi at spæla við, tí teir hava verið á besta HB liðnum eftir at freistin fyri niður­flyting var farin.
Aganevndin gav ikki TB viðhald í kæruni. Sagt verður, at teir tríggir spælararnir leiktu við HB í fjórði seinasta umfari, og at teir sostatt fluttu niður áðrenn triði seinasta dyst.
Avgerðin hevur við sær, at tað nú er púra greitt, at AB er stórfavorittur at flyta upp. AB fær í síðsta umfari vitjan av FC Hoyvík, meðan TB skal spæla á útivølli ímóti EB/Streymi.
Bæði AB og TB hava 58 stig, men málmunurin hjá AB er +50, meðan hann hjá TB er +44. Um uppflytingin skal gleppa AB av hondum, so skal TB leygar­dagin vinna við sjey mál­um fleiri í Streymnesi, enn AB vinn­ur á heimavølli ímóti FC Hoy­vík. Tað tykist rættuliga lítið sann­líkt.
Hina kæruna átti HB, sum alt heyst hevur verið í niður­flyt­ingar­vanda, men sum er kom­ið undan niðurflytingini, nú tað er greitt, at stigini, sum vóru vunnin ímóti TB, verða ver­andi í posanum.
HB kærdi EB/Streym fyri at hava nýtt ólógligan spælara, tá ið teir í Sundalagnum 5. oktober vunnu 3-0 á heimavølli ímóti HB og harvið tryggjaðu sær fram­haldandi rætt at spæla í næst­bestu deildini.
Talan var um spælara, sum var skrásettur á Skála. Fyrr í summar gjørdu Skála og EB/Streymur pappírs­arbeiðið, sum skuldi til fyri at flyta spælaran av Skála og í Sundalagið, og fráboðan hes­um viðvíkjandi varð send FSF skriv­stovuni. Men umsitingarligt mistak í FSF bar við sær, at flytingin ikki varð skrásett, sum hon átti at verið.
Aganevndin heldur ikki, at óhepna støðan kann lastast EB/Streymi, og tískil gav aga­nevndin ikki HB viðhald í kæruni.
Undan síðsta umfari er tað greitt, at tað verða 07 Vestur og FC Hoyvík, sum flyta niður úr næst­bestu deildini. Víkingur og EB/Streym­ur hava 31 stig, HB hevur 30 stig, FC Hoyvík hev­ur 26 stig, og 07 Vestur hev­ur 0 stig.