Liverpool tapti í dag 2-1 á heimavølli móti Wolverhampton í fjórða umfari í FA Cup. Liverpool hevur nú bara vunnið ein dyst av átta síðani ársskiftið. Tað var umdysturin í triðja umfari í FA Cup móti Plymouth Argyle.
Tað skal sigast, at Jurgen Klopp spardi fleiri av síðnum lyklaspælarum til dystin í dag, men menn sum Georginio Wijnaldum, Divock Origi og Roberto Firmino byrjaðu inni, meðan Philippe Coutinho, Daniel Sturridge og Emre Can komu inn.
Alíkavæl vann Wolverhampton, sum spælir í næstbestu deildini í Onglandi, rímiliga greitt. Liverpool hevði bóltin nógv, men Wolverhampton var minst líka nær við at skorað sítt triðja, sum Liverpool at skorað tvey.
Eftir eina góða byrjan í venjarastarvinum, so er nakað av trýsti á Jurgen Klopp nú. Liverpool er um at missa takið í oddastríðnum í Premier League og er úti av Liga Cup og FA Cup. Komandi umførini í Premier League verða avgerandi. Tá kom Chelsea, Tottenham og Arsenal á vitjan.
Tað er eisini trýst á Jurgen Klopp til at keypa, nú flytingarvindeygað er opið. Her hevur hann tó ikki vilja spælt við. Í Liverpool sakna tey skjóta vongin, Sadio Mané, sum er til afrikanska meistaraheiti.
Tottenham víðari í evstu løtu
Í hinum dystunum stóð nógv á Tottenham, sum var aftanfyri bæði 2-0 og 3-1 móti Wycombe Wanderers úr fjórðbestu deildini. Her vann Tottenham tó 4-3 í evstu løtu.
Chelsea hevði lætt spæl á heimavølli móti Brentford, sum spælir í næstbestu deildini. Her vann Chelsea heili 4-0. Manchester City vann 3-0 á útivølli móti Crystal Palace og er víðari.
Úrslit fjórða umfar:
Derby County 2 - 2 Leicester City
Liverpool 1 - 2 Wolverhampton Wanderers
Blackburn Rovers 2 - 0 Blackpool
Burnley 2 - 0 Bristol City
Chelsea 4 - 0 Brentford
Crystal Palace 0 - 3 Manchester City
Lincoln 3 - 1 Brighton & Hove Albion
Middlesbrough 1 - 0 Accrington Stanley
Oxford United 3 - 0 Newcastle United
Rochdale 0 - 4 Huddersfield Town
Tottenham Hotspur 4 - 3 Wycombe Wanderers
Southampton - Arsenal
Í morgin:
Millwall - Watford
Fulham - Hull City
Sutton United - Leeds United
Manchester United - Wigan Athletic
