Hósdagin 19. november fær Almannamálaráðið handað nýggja sambýlið fyri fólk við menningartarni við Mylnutún 7 í Klaksvík frá Landsverki.
Í hesum sambandi verður almenn móttøka á sambýlinum við Mylnutún 7 hósdagin 19. november millum kl. 14 og 16.
Almannamálaráðið hevur latið sambýlið við Mylnutún byggja.
Landsstýriskvinnan í almannamálum, Eyðgunn Samuelsen fegnast um, at fólk við menningartarni nú fáa eitt sambýli, har borgarnir hava hvør sína íbúð, sum er bygd til endamálið og tørvin.
- Búfólkini á sambýlinum við Mylnutún fáa góðar og virðiligar umstøður og kunnu kenna seg trygg í sínum nærumhvørvi. Við hesum fáa tey góðar fortreytir at liva eitt virkið og sjálvstøðugt lív – eisini uttan fyri heimið, sigur Eyðgunn Samuelsen.
Sambýlið við Mylnutún hevur 12 búeindir, allar búeindirnar eru knýttar at einum felagsøki.
