Munda er úr Oyndarfirði, dóttir Hans Jákup Abrahamsen úr Oyndarfirði og
Janu Abrahamsen f. Eldevig úr Elduvík. Tey áttu 11 børn, harav 9 enn eru á lívi.
Munda hevur altíð verið røsk og borið orð fyri at verið heldur rokalig.
Sum ung fór hon til Klaksvíkar at arbeiða sum húshjálp. Seinni arbeiddi hon í
Keypsamtøkuni, og gekk samstundis á Klaksvíkar Handilsskúla. Eftir loknað
skúlagongd í 1964 fór Munda at sigla við Tjaldrinum í tvey ár, har hon arbeiddi í
kioskini. Umborð á Tjaldrinum møtti hon leirvíkinginum Remi Langgaard, sum
eisini sigldi við har.
Munda og Remi giftust í 1967. Fyrstu árini búðu tey í Klaksvík, men í 1969
fluttu tey til Leirvíkar, og har hava tey búð síðani. Tey eiga 5 børn:
Hans Jákup, Robert, Jaspur, Reimund og Gudny, og tey eiga eisini
11 ommu- og abbabørn , sum tey eru sera glað fyri, og sum tey elska at forkela.
Í 1979 lat "Skóbúðin hjá Mundu" upp í kjallaranum hjá teimum, og har hevur Munda
starvast sjálv øll hesi góð 25 árini. Umframt handilin, hevur Munda eisini verið ógvuliga virkin í ymiskum nevndararbeiði: Tá børnini vóru smá, sat hon fleiri ár í nevndini hjá skótunum í Leirvík. Hon hevur sitið í barnaverndini í Leirvík í 25 ár,
harav sum formaður tey seinastu 20 árini. Hon er í umboðsráðnum hjá Norðoya Sparikassa, í umboðsráðnum hjá Fuglafjarðar sjúkrakassa og í bygdahúsnevndini í Leirvík.
Munda er burturstødd á føðingardegnum.
