– Mugu halda fast við keikantin um vit vilja vera við

El-Service er eitt felag, sum ger seg galdandi uttanlands á jøvnum føti við onnur el feløg. Teir ætla eisini at vera virknir í einari møgu­ligari oljuvinnu, og synergi effektin fer eisini at raka teir.
– Vit satsa uppá oljuna í okkara ætlanum, sigur John Eli Olsen, stjóri í El-Service.
Hann er púra sannførdur um, at olja verður vunnin úr føroyskum øki.
– Eg vænti heilt avgjørt, at teir fara at vinna olju úr føroyskum øki. Eg eri eisini vísur í, at tað fer at loysa seg at heinta oljuna upp, sum liggur í undirgrundini.
– Eg hevði ongantíð rokn­að við, at tað fór at spríka olja upp við fyrstu roynd­arboring. Vit mugu geva tol. Oljan er har – tað er bara ein spurningur um at finna hann, sigur John Eli.
Vilja veita og umvæla
Sosialurin spyr John Eli, hvør leikluturin hjá El-Ser­vice kann vera í einari oljuvinnu í Føroyum.
– Vit vilja fegin virka sum veitarar og gera umvæling­ar. Vit hava kanska enn ikki neyðuga førleikan inn­an oljuvinnuna, men tað kunnu vit tiltuska okkum. Føroyingar laga seg skjótt til nýggjar avbjóðingar, sigur hann.
– Men vit mugu halda fast við keikantin. Summar røddir hava frammi og sagt, at útlendingar skulu fáa kei­kantin, men tað haldi eg er heldur gávumilt. So verða føroysku fyritøkurnar við sviðið soð, sigur John Eli.
Skálafjørðurin má ikki steingjast
Eisini John Eli fylgir spent­ur við í kjakinum um Skálafjarðartunninil. Har hava summi nevnt, at ein brúgv yvirum fjørðin hevði verið rætta loysnin. Hesum er John Eli tó rúkandi ósamd­ur í.
– Skálafjørðurin avhong­ur av, at teir ikki steingja hann. Um teir gera eina brúgv, kunnu teir gott gloyma alt um at fáa eina veitingarhavn á Skála­fjørðinum. Boripallar stinga 150 metrar upp í loft, so teir sleppa ikki inn á fjørð­in. So mugu teir søkja til eitt ókyrrari pláss.
– Í einum lítlum plássi í Skotlandi, sum kallast Inver­gordon, hava teir eina veitingarhavn. Umstøð­ur­nar minna nógv um Skála­fjørðin við kyrrum vatni, men har hava teir ikki so nógvar fyritøkur í økinum, sum vit hava runt Skálafjørðin. Í so máta eru umstøðurnar betri her við Skipasmiðju og øðrum, sigur John Eli, sum hevur ætlanir um at leggja seg út í kjakið um Skálafjarðartunnilin.
John Eli sigur annars, at teir verður eingin vanlukka fyri teir, um eingin olja verður vunnin úr føroyskum øki.
– Tað fær ongar fylgjur fyri okkum. Vit hava virk­semi uttanlands, og vit eru tryggjaðir uppá tann mátan, sigur stjórin í El-Service at enda.