Herfyri hendi tann syrgiliga hending, at tveit mans duttu niður í Saksun. Tann eini maðurin doyði, meðan hin meiðslaði seg illa.
Hóast hendan ræðuliga vanlukkan er sjáldsom, so er tað kortini meira vanligt, at MRCC má rykkja út í føroysku náttúruna eftir ferðafólki, sum eru komin í neyð.
Vakthavandi hjá MRCC greiðir frá, at seinastu tvey árini er talið av ferðafólki í neyð eksploderað, og tað kemur meira enn so fyri, at fólk hava tørv á hjálp á til dømis Mykinesi og á øðrum vælumtóktum ferðamálum og mangt beinbrotið er komið fyri, verður greitt frá.
Enn síggja vit ikki nógv til, at ferðafólk leiga bátar og koma í havsneyð, men tá ið ferðafólk enda í trupulleikum í fjøllunum er tað MRCC, sum skal senda tyrlu og bátar avstað at hjálpa hesum.
- Tað er púra vist, at vit uppliva nógv til øktu ferðavinnuna í landinum og í ár merkja vit væl, at tað eru nógv ferðafólk í Føroyum, greiðir vakthavandi á MRCC frá.
