Mjølnir styrkir odda­støðuna

Kvinnurnar hjá Mjølnir halda framvegis ferðina heilt har frammi og eru greitt oddalið í løt­uni. Í gjárkvøldið var Mjølnir á Toftum og spældi ímóti Tern­uni, og gjørdist talan um ein trygg­an 3-0 sigur.
Bæði tey fyrstu settini fylgdi Ternan væl við upp til 16 ella 17, men so setti Mjølnir ferð­ina upp, undirstrikaði rína rutinu og avgjørdi settini. Hóast triðja sett endaði við somu sifr­um sum hini bæði, 18-25, var kortini munur á, tí her leyp Mjølnir beinanvegin avstað og var eitt skifti á odda 12-4, áðrenn Ternan kom eitt sindur meira við, tá bæði lið ímóti endanum eisini lótu spæl­ar­ar­nar á bonkinum sleppa upp í part.
Í hinum dystinum í gjár­kvøldið skuldi SÍ syrgja fyri at koma aftur á kósina, sam­stundis sum tað ráddi um ikki at missa í mun til liðini oman­fyri, Mjølnir og Fleyr. SÍ var í Kollafirði og spældi ímóti KÍF, og har eydnaðist at fáa ein 3-0 sigur til høldar.
Tað gekk rættiliga javnt á í fyrsta setti, har liðini fylgdust langt uppeftir, men ímóti end­anum fór SÍ avstað og vann 25-20. Í øðrum setti líktust SÍ-kvinn­urnar meira sær sjálvum og vunnu rímiliga trygt, men í triðja setti kom KÍF afturíaftur eina løtu, eftir at SÍ fyrst fór nokk so fitt framum, men so fór SÍ avstað aftur og vann sett­ið og dystin.
Sostatt er SÍ framvegis á triðja plássi, við sama stigatali sum Fleyr, men tó við einum dysti meira.

Næstu dystirnir
Eftir sigrarnar hjá Mjølnir og SÍ í gjárkvøldið, er eitt sindur av trýsti lagt á hini bæði liðini í fremstu kvartettini, Fleyr og ÍF. Og júst tey bæði hittast á Kambsdali í morgin, har ÍF við sigri veruliga kann sleppa upp í part, samstundis sum Fleyr við sigri veruliga fær oddasessin í eygsjón.
Sunnudagin spæla júst Mjølnir og ÍF, samstundis sum bæði Fleyr og SÍ hava dystir, sum á pappírinum síggja yvir­komiligir út, so tá vikuskiftið er av, kann toppurin bæði verða spjaddur ella enn meira saman­kroystur.
Hjá monnunum eru tríggir dystir, og Mjølnir og SÍ, sum eru ávikavist næst- og triðfremst, eru partur av tveimum teirra. Í kvøld skulu klaksvíkingar til Sør­vágs at spæla ímóti SÍ, og sunnu­dagin tekur Mjølnir ímóti odda­liðnum, ÍF.
Megnar Mjølnir at vinna hesar báðar dystirnar, nærkast FM-finalan munandi, men vinnur SÍ sínar báðar dystir, kann alt sunnukvøldið aftur síggja út, sum tað gjørdi síðsta sunnukvøld.