Í gjárkvøldið rendi ein bilur á ein garð við barnagarðin á Vegnum Langa.
Garðurin fekk stóran skaða, men bilførarin gjørdi ikki mætari enn at hann stakk av og koyrdi víðari.
Onkur sá tilburðin og boðaði løgregluni frá.
Tá ið løgreglan kom á staðið vísti tað seg, at bilførarin hevði verið so "óheppin, at nummarplátan var dottin av bilinum í óhappinum og lá á beint við.
Sostatt var einki fyri hjá løgregluni at finna eigaran og hann varð tikin á bústaði sínum eina løtu seinni.
Løgreglan sigur, at maðurin var dýrandi fullur so tað málið fær eitt dýrt eftirspæl fyri hann.
Annars hevur verið friðarligt hjá løgregluni í nátt.
Tvær ferðir er løgreglan boðsend í sambandi við harðskap.
Talan er um menn, sum eru farnir til hendurs og onkur er sligin og hevur meldað.
Í tí eina førinum veit løgreglan, hvør harðskapsmaðurin er og hann fer løgreglan at seta seg í samband við seinni í dag.
Í hinum førinum kannar løgreglan málið.
