Í gjár varð boðað frá ferðsluóhappi á Hvítanesvegnum undir Keypsamtøkuni í Hoyvík. Ein mótkoyrandi lastbilur misti fiskakassar av lastini. Ein kassi rakti ein mótkoyrandi í forrútin, sum fór í knús.
– So fóru vit at kanna, hvør tað mundi vera, og viðkomandi varð funnin og skuldsettur, sigur vaktleiðarin á politstøðini.
Slíkt brot á ferðslulógina gevur treytaleysa frádøming av koyrikortinum.
– So tað má vera ein áheitan á øll um at spenna lastina fasta. Tíbetur hendi bara materiellur skaði av hesum, forrúturin brotnaði og síðuspeglið og okkurt annað, sigur vaktleiðarin.
Í gjár kom eisini ein fráboðan til løgregluna um, at olja var á vegnum úr Sørvági til Sandavágsháls. So mikið nógv, at Landsverk mátti út at spula vegirnar.
Eisini av Oyggjarvegnum kom ein fráboðan um olju á vegnum frá Gellingarkletti og norður í Kollfjarðadal.
