Krøvini til fótbóltsfeløgini, skulu tey fáa luttøkuloyvi til kappingar hjá FSF, eru longu hørð í dag, men stendur tað til FC Suðuroy, skulu krøvini herðast enn meira.
Felagið hevur til aðalfundin í morgin sent inn uppskot um, at feløg við fíggjarligum trupulleikum ikki skulu sleppa at gera sáttmálar við spælarar, fyrr enn tey kunnu leggja fram ein nøktandi roknskap, og møguliga skal slíkum feløgum eisini áleggjast at minka um lønarútreiðslurnar beinanvegin.
Í viðmerkingunum til uppskotið sigur FC Suðuroy, at endamálið við tí er at fyribyrgja, at feløg gera sáttmálar fyri upphæddir, tey ikki eru før fyri at gjalda.
