Sambandsflokkurin, Tjóðveldisflokkurin og Javnaðarflokkurin, sum seinasta mansaldurin ikki hava torað at gjørt ímóti vilja Fólkafloksins á fiskivinnuøkinum, eru nú so sera samdir í makrelmálinum, at ein nýggja samgonga longu er at hóma.
Somuleiðis sóðu vit í gjár, at tað er sera smart at fáa eldfim mál samtykt í tinginum - júst tá eingin samgongumeiriluti er! Vit hava jú havt minnilutadiktatur í so nógvum málum. Ikki bara í rúsdrekkamálum, men í fleiri sokallaðum »etiskum málum«, hvat tað so enn merkir. Tí er politikkur ikki etikkur? Ella er politikkur óetiskur? Jú, kanska...
Men »hvorom alting er«, so megnaði ein meiriluti av løgtinginum at samtykkja uppskotið hjá Bjørt Samuelsen, Kára á Rógvi og Magna Laksáfoss eina og aleina tí, at minnilutadiktaturið ikki virkaði, tí eingin samgonga var at seta í veð!
Fleiri av teimum, sum vilja hava blokerandi minnilutaveldi, royndu at trýsta – og elvdu teimum »rætttrúgvandi« í samgonguni um at trýsta. Men einki bagdi. Minnilutadiktaturið er fallið við staðfestingini minnilutasamgonguni hjá Kaj Leo og Aksel. Smart hjá summum – og keðiligt hjá summum...
