Fríggjadagin eydnaðist Føroya Arbeiðsgevarafelag og Føroysk Miðlafólk at semjast um ein nýggjan tvey ára sáttmála. Tað verður upplýst á heimasíðuni hjá Vinnuhúsinum.
Nýggi sáttmálin inniber, at limirnir hjá Føroysk Miðlafólk fáa eina lønarhækking á 1,98% hin 1. november 2015 og 2,25% hin 1. november 2016.
Talan er um somu hækking sum í hinum semjunum, ið eru gjørdar millum fakfeløg á privata arbeiðsmarknaðinum og Føroya Arbeiðsgevarafelag.
Partarnir undirskrivaðu eisini avtalu um fráboðanarfreist í sambandi við verkfall, og hevur Føroya Arbeiðsgevarafelag harvið gjørt avtalu um fráboðanarfreist, við øll fakfeløg felagið hevur sáttmála við.
