Tórshavnar kommuna verður partur av altjóða átakinum »Earth Hour 60« leygardagin 29. mars.
Í ein tíma fara milliónir av menniskjum kring allan knøttin at sløkkja ljósið fyri at sýna umhvørvinum ans.
Øll kunnu taka lut í tiltakinum henda tíman. Tú kanst melda teg til tiltakið á Facebook - eisini um tú ætlar at verða heima hetta kvøldið, men kortini ynskir at sløkkja ljósið.
Í ár verður ljósið sløkt í miðbýnum leygarkvøldið 29. mars frá kl. 20:30-21:30.
Gøtuljósini í miðbýarøkinum eru øll sløkt henda tíman.
Umframt at ljósið verður sløkt, fara starvsfólk og ungdómar á Margarinfabrikkini at skipa fyri tiltaki á Speakers’ Corner. Á skránni verður tónleikur og dansur.
Kommunan bjóðar flótt kokao, og Sigrun Mohr, býráðslimur, fer at flyta fram røðu í myrkrinum.
Samstundis, sum Tórshavnar kommuna er við í átakinum »Earth Hour«, mælir kommunan øllum borgarum og øðrum at gera tað sama; at sløkkja ljósið henda tíman, leygarkvøldið 29. mars. Tað verður myrkt hesa løtuna í miðbýnum, tí heitir kommunan eisini á øll um at taka lummalyktir við til tiltakið.
Átakið byrjaði í Sidney í Avstralia í 2007, tá 2,2 milliónir fólk sløktu ljósið fyri at vísa umhvørvinum ans. Síðani eru lond kring allan heim løgd aftrat skránni á hvørjum ári.
Tórshavnar kommuna hevur tikið lut í »Earth Hour 60« síðani 2009. Undirtøkan fyri átakinum hevur verið sera góð hesi árini.
Tórshavnar kommuna heitir á øll fólk um at verða ansin í ferðsluni myrku løtuna!
