Jákup Mikkelsen, landsstýrismaðuri í fiskivinnumálum, hevur óivað ein baktanka við at svølta Sjósavnið á Argjum. Hetta er greitt tekin um, at tað smakkar honum illa, at Sjósavnið er har, sum tað er.
Tað skrivar Jógvan Arge, býráðslimur í Havn og formaður í Mentanarnevndini, í skrivi.
- Tað verða neyvan tær 100.000 krónurnar, sum landsstýrið hevur tikið frá savninum, ið fara at bjarga undirskotinum á landsins fíggjarlóg. Men tað er óvirðiligt, at hesir fittu og áhugaverdu sýnislútir í høvuðsstaðnum nú eisini eru vorðnir offur fyri politisku herferðini at pína miðstaðin niður. Sum nýggja landsstýrið hevur borið seg at ta stuttu tíð, tað hevur sitið við ræðið, er lítil vón um, at tað gongur í seg sjálvt í hesum málinum, skrivar Jógvan Arge.
Hann mælir kortini til, at Tórshavnar býráð, sum frá fyrsta degi hevur stuðlað tí sera áhugaverda og væl umtókta Sjósavninum, meðvirkar til, at savnið fær ta fígging, sum er neyðug, so tað kann virka nøktandi og á tryggum grundarlag.
Heðin Mortensen, borgarstjóri, og Bogi Andreasen, býráðslimir, hava fyrrapartin somuleiðis harðliga mótmælt ætlanini at skerja játtanina til Sjósavnið.
