Broytta uppgávubýtið millum landsstýrið og økisráðini fer at geva økjunum nakrar fyristingarligar uppgávur. Men neyvan verður hetta nóg mikið til at tryggja eitt nóg stórt útboð av størvum, sum er fortreytin fyri, at fólk við útbúgvingum seta búgv í økjunum.
Tískil mælir Javnaðarflokkurin eisini til, at politiskt verður gjørt av, at nakrir av almennu stovnunum, sum í dag liggja í Havn, og almennum stovnum, sum fara at koma, verða fluttir út í økini.
Hetta vil lækka trýstið, sum í dag er á Havnina, bæði viðvíkjandi t. d. íbúðum, barnaansing og eldrarøkt.
Framkomnu samskiftismøguleikarnir og ein betrað samferðsluskipan vil gera, at tað ikki longur eru nakrar praktiskar forðingar fyri, at almenn umsiting eisini kann liggja uttan fyri Havnina.
