Klaksvíkar Kommuna skal í kvøld viðgera hugskotið hjá smápartafelagnum HERL-ligt, sum hevur spurt um loyvi at nýta gamla Skipafelagsbygningin í Klaksvík sum alment mentanarhús. Ætlanin er at brúka bygningin til ymisk tiltøk sum sjónleik, konsertir, møti, veitslur, dans og annað. Smápartafelagið HERL-ligt ætlar eisini at gera eina innskotna loftshædd, sum skal innrættast sum matarstað við skeinkiloyvi.
Fyrsta viðger av um- og nýbyggingini av Ósaskúla er eisini á skránni í kvøld.
Klaksvíkar Kommuna skrivar á sínari heimasíðu, at byggingin av skúlanum við Ósánna gongur sum ætlað, men tað vísir seg, at reguleringin av upprunaligu samtyktu íløgu-avsetingini í 2010 - úr 18 milliónur krónum og niður í 15 milliónur krónur ? ikki heldur. Byggingin og tíðarætlanin fyri liðugtgerð av verkætlanini krevur, at 17 milliónir krónur eru tøkar í inniverandi ári. Tí er tørvur á einari eykajáttan upp á 2 milliónir krónur.
