Fiskimálaráðið kunngjørdi í dag, at afturlatnu uppboðssølurnar av rættindum at veiða 7.490 tons av norðhavssild og 10.901 tons av makreli, ið upprunaliga skuldi verða ávikavist 20. juni og 27. juni 2018, eru enn einaferð útsettar.
Sum grundgeving varð víst til, at man ynskir at fáa menningarkvoturnar avgreiddar áðrenn og í tíðindunum í Kringvarpinum segði Høgni Hoydal, at hann væntar tær verða avgreiddar hvørja løtu.
- Tað stutta av tí langa er, at vit høvdu ætlað at verði klár við menningarkvotunum um ólavsøkumundið. Tað sum hendir er, at fyrisitingin fer ígjøgnum allar tær fyrisitingarligu metingarnar av umsóknunum. Nevndin sum hevur gjørt ta fakligu innstillingina hevur gjørt sítt arbeiði væl, og so skal man tjekka at alt er í lagi í mun til kunngerð og reglur og fáa gjørt svarini liðug. Tað er tað vit bíða eftir, men royna at fáa tað avgreitt hvørja løtu, segði Høgni Hoydal.
