Gunnar Nielsen vardi málið, og Kaj Leo í Bartalsstovu fekk 69 minuttir á vøllinum, tá lið teirra, FH, sum hevur endurvunnið íslendska meistaraheitið vitjaði Víking Reykjavík á útivølli.
Talan var um ein týdningarleysan dyst í næstseinasta umfarinum í íslendsku pepsideildini. Víkingur Reykjavík hevur ongan møguleika at koma út í Evropa, og FH bíðar bara eftir at fáa steypið handað komandi vikuskiftið. Víkingur vann dystin í dag 1-0 við sigursmáli, sum var skorað í 14. minutti. Gunnar Nielsen hevði sambært Morgunblaðnum onkra góða bjarging í dystinum.
Sonni Ragnar Nattestad var leikbannaður, tá lið hansara Fylkir spældi javnleik 2-2 ímóti Þrótti. Úrslitið merkir, at Fylkir framvegis er tvey stig undir niðurflytingarstrikuni.
Seinasti leikdagurin verður leygardagin. FH tekur ímóti ÍBV, og Fylkir vitjar KR á útivølli.
Støðan í pepsideildini nú bert eitt umfar er eftir at leika :
| 1 | FH | 21 | 12 | 6 | 3 | 31:16 | 42 |
| 2 | Stjarnan | 21 | 11 | 3 | 7 | 39:30 | 36 |
| 3 | Breiðablik | 21 | 10 | 5 | 6 | 27:17 | 35 |
| 4 | KR | 21 | 10 | 5 | 6 | 26:20 | 35 |
| 5 | Fjölnir | 21 | 10 | 4 | 7 | 39:25 | 34 |
| 6 | Valur | 21 | 9 | 5 | 7 | 40:28 | 32 |
| 7 | ÍA | 21 | 10 | 1 | 10 | 28:32 | 31 |
| 8 | Víkingur Reykjavík | 21 | 8 | 5 | 8 | 27:31 | 29 |
| 9 | ÍBV | 21 | 6 | 4 | 11 | 22:26 | 22 |
| 10 | Víkingur Ólafsvík | 21 | 5 | 6 | 10 | 22:34 | 21 |
| 11 | Fylkir | 21 | 4 | 7 | 10 | 25:37 | 19 |
| 12 | Þróttur R. | 21 | 3 | 5 | 13 | 18:48 | 14 |
