Randi Jacobsen
Heildarætlanin viðvíkjandi harðskapi í parlagi og nærsambondum staðfestir, at føroyska samfelagið ikki tekur sær nóg væl av útlendskum kvinnum í Føroyum.
- Vit fara nú at orða ein integrasjónspolitikk, sigur Annika Olsen, landsstýriskvinna í innlendismálum.
Hagtølini hjá Kvinnuhúsinum vísa, at heilt nógvar útlendskar kvinnur ikki hava tað gott í Føryum. Eitt ár vóru yvir 20 prosent av teimum kvinnum, sum gistu í Kvinnuhúsinum, útlendskar kvinnur.
- Hetta eru ræðandi tøl, sigur Annika Olsen.
Eitt tilmæli er at broyta føroysku útlendingalógina samsvarandi ásetingunum í donsku útlendingalógini soleiðis, at útlendingar, ið skulu sameinast við maka í Føroyum, kann fáa noktað uppihaldsloyvi, um makin í Føroyum hevur fingið frælsistøku fyri ávís revsirættarlig misbrot móti fyrrverandi maka ella hjúnarfelaga.
Útlendskar kvinnur eru í serliga viðkvæmari støðu í Føroyum, tí tær kenna ikki samfelagið, kenna ikki síni rættindi, hava onga familju, og tær duga sum oftast ikki málið.
Tað ræður um at hava upplýsandi tilfar á nøkrum høvuðsmálum, tá ið útlendskar kvinnur koma til landið.
Kvinnurnar skulu eisini hava rætt til tulk, tá ið tær skulu samskifta við myndugleikar í Føroyum.
Hetta er nakað av tí, sum nevnt er í heidlarætlanini.
