Føroyski fótbóltsspælarin, Meinhard E. Olsen, skiftir eftir øllum at døma úr svenska felagnum GAIS til norska felagið Bryne FK. Tað skrivar eitt nú Bergens Tidende í dag.
Blaðið skrivar, at skiftið er treytað av at Meinhard klárar læknakanningina. Hereftir kann hann skriva undir við felagið, sum spælir í næstbestu norsku deildini.
Meinhard E. Olsen gerst harvið annar føroyingurin í Bryne FK-hópinum, har Rógvi Baldvinsson nevniliga eisini spælir.
Hetta verður ikki fyrsta uppihaldið hjá 23 ára gamla Meinhardi E. Olsen í Noregi. Í 2019 spældi hann nevniliga við Kristiansunds BK.
