Meinhard E. Olsen stóð fyri einum framúr góðum avriki, tá Mjøndalen á heimavølli í dysti í næstbestu norsku fótbóltsdeildini vann 4-1 á Sandnes ULF, ið lat Gullbrand Øregaard sleppa á vøllin, tá ein hálvur tími var eftir av dystinum.
Uppá sjey minuttir, millum tólvta og nítjunda minutt í fyrra hálvleiki gjørdi Meinhard ikki mætari enn at skjóta eitt reint hattrick fyri Mjøndalen.
Í steðginum var Mjøndalen á odda 3-1. Martin Ovenstad staðfesti sigurin í 65. minutti.
Meinhard hevur nú skotið seks mál og lagt upp til fimm mál í 22 dystum.
Meinhard var skiftur út tá 82 minuttir vóru leiktir av dystinum. So dysturin í kvøld var ein føroyingauppgerð í 22 minuttir, tá bæði Meinhard og Gullbrandur vóru á vøllinum.
Mjøndalen er nummar 10 í deildini við 30 stigum. Trý stig eru upp til sætta plássið, ið gevur rætt til at leika Play Off dystir um uppflyting. Sandnes ULF er nummar fimm í deildini við 37 stigum.
Aftaná skaðafráveru sat Rógvi Baldvinsson á beinkinum hjá Bryne í kvøld.
Bryne vann á heimavølli stórsigur 5-0 á Raufoss. Bryne var á odda 2-0 í steðginum.
Bryne er nummar 13 í deildini við 23 stigum.
In.fo vónar seinni í kvøld at kunna vísa málini Meinhard skoraði móti Sandnes ULF.
