Kanningin hjá Hera á Rógvi vísur, at tað er sum heild, at bæði vørur og tænastur eru dýrari í Føroyum enn í Danmark.
Eini 45% av allari nýtslu hjá einum húsarhaldi eru tænastur av ymsum slagi og 55% eru matur og aðrar ítøkiligar handilsvørur.
Í Føroyum er matur og aðrar vanligar gerandisvørur 20% dýrari at keypa enn í Danmark.
Og fjarskiftið er serstakliga nógv dýrari í Føroyum enn í Danmark, tí á hesum øki er prísmunurin heili 45%.
Hinvegin vísir kanningin eisini, at aðrar vørur, enn matur, eru 14% dýrari í Føroyum enn í Danmark og býli er eini 30% dýrari enn í Danmark.
Somuleiðis eru renturnar í Føroyum nógv hægri enn í Danmark.
Summar vørur og tænastur eru eisini bíligari í Føroyum enn í Danmark, eitt nú at fara tannlækna, bara fyri at nevna eitt dømi.
- Men ein orsøk til tað kann eisini vera, at tá ið alt annað er goldið, er ikki so nógv eftir til tannlæknar og aðrar tænastuveitingar av ymsum slagi.
Hinvegin er brennievni til bilar og hús eisini væl bíligari í Føroyum enn í Danmark.Talan er um ein prísmun upp á 17-22% til okkara fyrimun og tað er nakað, sum merkist í heildarmyndini.
Avgjøld gera munin
Tað, sum ger brennievni nógv bíligari í Føroyum, er, at ein stórur partur av samlaða prísinum, er avgjøld av ymsum slagi, sum tað almenna krevur.
- Í Føroyum eru avgjøldini nógv lægri enn í Danmark. Og verða prísirnir ruddaðir fyri avgjøld, er tað ógvuliga ivasamt um prísurin á brennievni tá hevði verið bíligari í Føroyum, enn í Danmark.
Men í hesum sambandi kann leggjast afturat, at samgongan hevur í umbúna at leggja umhvørvisgjald á brennievni, so tann munurin fer eisini at minka nokk so fitt.
Hinvegin hava vit heldur ikki ognarskatt í Føroyum,men tað eru eisini røddir frammi um tað, ikki so nógv frá politiskari síðu - enn í hvussu so er. Higartil eru tað mest búskaparfrøðingar, sum hava talað fyri at seta ognarskatt í verk í Føroyum.
