Gerardo Martino fer frá sum Barcelona venjari, eftir avtalu við felagið, nú tað miseydnaðist at vinna meistaraheitið.
Barcelona skuldi vinna á Atletico Madrid í seinasta dystinum í kappingarárinum, fyri at vinna meistaraheitið, men ein javnleikur gav heitið til Atletico.
Tað merkti, at Barcelona endaði kappingarárið við ongum steypi fyri fyrstu ferð síðani 2007-08.
Eg eri keddur um, at eg ikki leveraði. Eg takki felagnum fyri, at teir høvdu álit á mær, segði Martino.
Gerardo Martino avloysti Tito Vilanova í juli síðsta ár, tá hann skrivaði undir ein tvey ára sáttmála á Nou Camp. Tað var hansara fyrsta starv uttan fyri Suðuramerika, síðani eitt seks mánaða tíðarskeið sum spælari fyri Tenerife í 1991.
