Marine Harvest Føroyar hevur havt eitt samstarv við Bakkafrost, har fiskurin hjá felagnum er slaktaður og kruvdur á virkinum hjá Bakkafrost á Strondum. Nú Bakkafrost byggir nýtt og stórt laksavirki og ætlar at savna alt sítt virksemi á Glyvrum, er spurningurin, hvussu verður við virkinum á Strondum.
Eitt av alibrúkunum hjá Marine Harvest Føroyar liggur beint uttan Haldarsvík, og eitt annað liggur út fyri Fossá, sunnan fyri Haldarsvík. Á Oyndarfirði hevur felagið stórt alivirksemi, og enn hevur felagið ikki endaliga riggað alibrúkið út fyri Veðranesi av.
Hvar Marine Harvest Føroyar fer at slakta og kryva, tá tøkan byrjar aftur í oktober, er endalig støða ikki tikin til enn. Felagið keypti fyri eini tíð síðan fiskavirkið í Haldarsvík, sum felagið í løtuni brúkar til goymslu.
Um tað verður hetta virkið ella eitt annað, sum verður karmur um slátur-og kryvjivirksemið hjá felagnum, fer tíðin at vísa. Í aðrar mátar er ikki óhugsandi, at felagið kanska keypir virkið hjá Bakkafrosti á Strondum, tá Bakkafrost ikki fer at brúka virkið meira.
Tá tøkan hjá Marine Harvest Føroyar byrjar aftur í oktober, er væntandi, at felagið fer at taka umleið 50 tons av laksi um dagin - ella umleið 250 tons um vikuna - og væntandi er, at tøkan fer at halda fram og hanga saman til einaferð út á summarið 2016.
