Hondbóltur
Tað er neyvan nakar sum helst ivi um, at besti málverjin í føroyskum manshondbólti eitur Marian Cirloganescu. StÍF hevur nú í fleiri ár verið ein av fremstu garantunum fyri árligu steypaveitsluni hjá StÍF. Ja, í somikið nógv ár, at fólk eisini eru farin at tosa um møguleikan fyri at hava hann á føroyska manslandsliðnum.
Og ungur at siga nei-takk
Sjálvur hevur Marian so avgjørt heldur einki ímóti hesum. Tvøtur ímóti, so hevur verið arbeitt við málinum, men ein meira enn 40 ára gomul konventión, sum ikki loyvir dupult statsborgaraskapi, forðar tó fyri hesum.
- Eg varð spurdur av landsliðsvenjaranujm, um eg hevði hug at spæla fyri føroyska landsliðið. Sjálvur haldi eg ikki, at eg eri somikið gamal, at eg havi ráð at lata ein slíkan møguleika fara framvið.
- Men reglurnar, sum forbjóða dupultum statsborgaraskapi, eru ein forðing í hesum. Eg veit ikki, hvussu mín framtíð í Føroyum sær út, tá eg ikki spæli hondbólt meira. Tí vil eg hava møguleikan at flyta aftur til Rumenia, men tann møguleikan kann eg missa, um eg ikki kann hava dupultan statsborgaraskap. Sum eg havi skilt tað, so er spurningurin kannaður, men niðurstøðan er, at lóggávan ikki loyvir dupultum statsborgaraskapi, og so er ikki so nógv at gera við tann spurningin, sigur Marian.
