Skilið er í veruleikanum ongantíð so ringt sum nú, tí fjølmiðlarnir fáa í heilum mainipulerandi tíðindaskriv úr aðalráðunum. Stundum eru tað viðmerkingar frá landsstýrisfólkum til okkurt, sum hevur verið frammi í almenna kjakinum í bløðum og á portalum. Og rættiliga ofta »fegnast« landsstýrisfólk um okkurt, sum tey hava gjørt og halda vera so gott, at øll onnur skulu vita, hvussu glað tey er, og viðhvørt royna tey at fáa fjølmiðlarnar orðarætt at bera tíðindi víðari, so tey verða vinklað júst soleiðis, sum landsstýrisfólkið vil hava tað.
Eitt dømi um tað er »tíðindaskriv« frá »stjórnarsamskiparanum« hjá Karsten Hansen um brilluískoyti til pensjónistar og børn undir 16 ár. Har verður greitt frá, at hesi nú fáa hægri ískoyti til brillur. Men tíðindaskrivið sigur einki um, at tey millum 16 og 67 ár verða við sviðusoð og fáa nú einki.
Fíggjarmálaráðið sendi fríggjakvøldið 13. apríl klokkan 23:14 út eitt tíðindaskriv, sum verjir avgerðina um at niðurleggja eitt nú Landsbankan. Fyri tað fyrsta er tað eitt løgið tíðspunkt at senda út tíðindaskriv – og tað er ikki fyrstu ferð – og tað er uttan iva beinleiðis ætlað tí ókritiska partinum av pressuni so sum Vágaportalinum. Við at senda út seint fríggjakvøld, so sleppur fíggjarmálaráðharrin undan næskum spurningum frá Kringvarpinum, Rás2 og bløðunum.
Slík framferð er ikki bara óheppin, men beinleiðis óhugnalig, og løgmaður átti at hugt í leiðreglurnar fyri góðan fjølmiðlasið – og givið landsstýrisfólkum og aðalstjórum eitt eintak av reglunum, tí spinndoktararnir í ráðunum kenna eftir øllum at døma ikki hesar leiðreglur.
