- Makrelur etur ikki yngulin av toski, hýsu og upsa, og er tí ikki beinleiðis orsøk til vánaligu gongdina í botnfiskastovnunum. Tað skrivar Havstovan í dag.
Hetta er niðurstøðan eftir at Havstovan ehvur gjørt magakanningar av meira enn 1500 makrelmagum, tiknir á Landgrunninum síðani 2011.
- Orsøkin er helst, at yngulin og makrelurin ikki eru á sama stað til somu tíð. Kanningarnar vísa eisini, at makrelurin etur til dømis hvítingsbróðir og nebbasild, sum eisini er føði hjá størri botnfiski, og soleiðis kann ávirka botnfiskin óbeinleiðis.
Kanningarnar hjá Havstovuni vísa, at makrelurin kemur í føroyskan sjógv í apríl, mai mánað og verður verandi til út í novembur.
Í 2011 byrjaði Havstovan at kanna makrelin í føroyskum sjógvi. Tað var eftir, at fólk fyri fyrstu ferð sóu makrelin kóka í vatnskorpuni, har hann sílaði djóraæti úr sjónum.
Øll frágreiðingin um leiklutin hjá makreli á landgrunninum er at lesa her.
