Tað er ikki alt gull, ið glitrar, sigur orðatakið, og tey orðini má Jacob Pauli Hammer, reiðari á partrolarunum Steintór og Niels Paula í Hvalba, sanna, nú makrel-háárstíðin er av.
- Nei, tað kann ikki sigast annað, enn at makrelfiskiskapurin gjørdist eitt stórt skuffilsi hjá okkum. Vit høvdu vónir um at fiska makrel og sild fyri einar 20 milliónir krónur, men tað bleiv bara 10-11 milliónir, sigur hann.
Jacob Pauli Hammer er sjálvur er skipari á Steintór, sum hann reiðir út og eisini eigur saman við fleiri øðrum. Hann er eisini reiðari á Niels Paula, sum tó hevur aðrar eigarar. Teir eru nú til upsafiskiskap.
Sildaboykottið hjá ES og góði makrelfiskiskapurin í Grønlandi eru óbeinleiðis orsøkirnar til, at makrelháárstíðin hepnaðist so illa hjá hvalbiartrolarunum.
Móttøkuskip svíktu
- Vit hildu okkum hava gjørt góðar avtalur við tvey móttøkuskip, eitt russiskt og eitt kinesiskt, men tey svíktu okkum bæði tvey. Kinesarnir komu ikki til tíðina, tí teir tóku ímóti í Grønlandi, og tað mundi lukkast so mikið væl, at teir ikki hildu seg hava skund. Tá teir so endiliga komu, stungu teir av aftur uttan at gera fullan túr. Russarin kom til tíðina, hann kom síðst í juni, men hann fór, áðrenn hann skuldi. Hvørgin teirra helt avtaluna, vit høvdu gjørt við teir um prís, greiðir Jacob Pauli Hammer frá.
Serliga sildin fekk sera vánaligan prís.
- Tann eina túrin kostaði tað okkum pengar at sleppa av við veiðuna, tí vit fingu bara 75 oyru kilo fyri hana, og avreiðingargjaldið var eina krónu kilo. Tað var sildin, sum var so vánalig, og tað bar ikki til at fiska makrelin reint, greiðir Jacob Pauli Hammer frá.
Tóku sjálvir fiskin
Tá bæði móttøkuskipini vóru farin, fóru Steintór og Niels Pauli sjálvir at føra makrelin og sildina til lands í kørum. Teir seldu til Fiskavirkið í Hvalba og til Varðan Pelagic á Tvøroyri. Tað riggaði væl við góðskuni, sum bleiv heilt góð tá, og prísurin varð eisini í lagi, men skipini eru ikki riggað til uppsjóvarfiskiskap.
- Uppsjóvartrolini eru ógvuliga stór í mun til botntrolini, vit fiska upsa við, og vit hava ongar netatrumlur. Tí var tað torført og nógv baks av at taka inn. Tað bar heldur ikki til at koyra so nógv í kørini, tí gjørd vit tað, bleiv góðskan verri, greiðir Jacob Pauli Hammer frá.
Partrolaraflotin hevði rætt at fiska til samans 24.000 tons av makreli og 13000 tons av sild. Talan var um felagskvotu við hámarki, har hvørt skipið í mesta lagi kundi fiska 10 prosent.
Og hóast mótgangin eydnaðist tað Steintór og Niels Paula at fiska teirra part av makrelkvotuni, meðan nakað av sild var eftir.
Umhugsa íløgur
Jacob Pauli Hammer sigur, at royndirnar í ár gera, at tað ikki verður so lokkandi at royna sama leist við móttøkuskipum næsta ár.
- Vit umhugsa sjálvandi alla tíðina, hvussu og hvat vit skulu gera, og annaðhvørt mugu vit royna at gera betri avtalur næsta ár, ella gera íløgur í tangar og netatrumlur, so tað fer at bera betri til at fiska sjálvir. Alt ber til, men í báðum førum hevur tað stóran týdning fyri okkum, at vit í góðari tíð fáa at vita, hvat og hvussu nógv vit sleppa at fiska, leggur hann dent á.
