- Vit fingu ein fyrispurning, um tað bar til at keypa bensin til bátarnar. Vit svaraðu nei.
Tað sigur Hendrik Egholm, stjóri í Magn, tá hann verður spurdur, um Sea Shepherd hava spurt um loyvi at keypa bensin frá felagnum.
Paul Watson hevur fleiri ferðir skrivað á Facebook, at felagsskapurin ikki fær proviant og bensin í Føroyum, men sambært heilsølunum, so hava teir ongan fyrispurning fingið frá felagsskapinum.
Øðrvísi er tó við oljufeløgunum. Hendrik Egholm greiðir frá, at tað er eitt tilvitað val.
- Vit ætla ikki at selja bensin til teirra. Tey bóðu um bensin til bátarnar, ið sigla runt og órógva grindina. Tað vilja vit ikki selja til.
Effo ynskti ikki at gera viðmerking til søguna.
