Nógv fólk nýttu høvið at heilsa upp á Klæmint Weihe hendan dagin. Røður vóru hildnar, og sangur og tónleikur var eisini á skránni.
Tey sum hildu røður vóru: Poul Arni Jacobsen, stýrisformaður í SEV, Walther Damgaard frá Ingeniørfirmaet P. A. Pedersen í Keypmannahavn, Kaj Stoumann frá Brønderslev og Oplands Elforsyning og Steen Juul Pedersen, kaðal- og linjumeistari hjá SEV, sum helt eina sera skemtingarsama røðu.
Dupultkvertettin í Ebenezer sang, og Edvard Nyholm Debes og Finnur Hansen framførdu tónleik.
Klæmint er 54 ára gamal og sørvingur. Hann tók realskúlaprógv í 1967, og í 1971 var hann útlærdur radiomekanikari.
Eftir at hann var útbúgvin veikstreymsverkfrøðingur í 1976, arbeiddi hann sum verkfrøðingur í Danmark, áðrenn hann fekk starv sum verkfrøðingur hjá SEV 1. januar 1980. Skrivstovan var tá á Hálsi í Havn.
Klæmint tók við sum fyribilsstjóri á SEV í 1982 og varð settur í fast stjórastarv í 1983.
Í hansara stjóratíð er stovnurin vaksin nógv, og nógvar stórar útbyggingar eru gjørdar kring landið.
Klæmint er eisini kendur frá ymiskum øðrum samanhangum, sum t.d. var hann
nevndarlimur í Føroya Banka, Hitafelagnum og Fjarhitafelagnum, og hann var formaður í Vágatunlinum. Í dag er hann formaður í Smyril Line.
