Fyrrverandi framherjin hjá Liverpool, Stan Collymore heldur, at núverandi venjarin hjá Fulham, Roy Hodgson er tann rætti maðurin til at loysa Rafael Benitez av.
Hetta skrivar Stan Collymore í føstu klummu sínari í tí kenda bretska blaðnum, The Daily Mirror. - Roy Hodgson fær mína atkvøðu sum ársins venjari í Premier League, aftaná tey ótrúligu avrikini hann hevur framt við Fulham. Nú vóni eg av innasta hjarta, at hann fær starvið, sum venjari hjá Liverpool, skrivar Stan Collymore.
Í juli 1995 gjørdist Stan Collymore tann dýrasti spælarin í søguni hjá Liverpool, tá hann kostaði felagnum 8 miljónir bretsk pund.
Stan Collymore trýr ikki leysasøgunum um, at José Mourinho gerst venjari hjá Liverpool.
- Eg havi mist vónina um, at José Mourinho kemur til Liverpool. Liverpool hevur ikki ráð til at seta Mourinho í starv, og eg rokni við, at Mourinho vil slepa til eitt felag, har hann sleppur at brúka fleiri pengar, staðfestir Stan Collymore.
Stan Collymore spældi 81 dystir fyri Liverpool, og hann skoraði 35 mál í hesum dystunum.
