Mál og samrøður: Víkingur-EB/Streymur 3-1 (FM1)

Víkingur hevur togað seg uppá triðja plássið í betrideildini við einum 3-1 heimasigri á EB/Streymi í Sarpugerði í Norðragøtu í kvøld.

Jóannes Hansen tók soleiðis samanum dystin á in.fo fyrr í kvøld: "Í fínum summarveðri vann Víkingur í góðveðrinum í Sarpugerði í kvøld 3-1 ímóti EB/Streymi. Talan var um framskundaðan dyst í sekstanda umfari, sum er ólavsøkuumfarið.

Sigurin ber við sær, at Víkingur eftir fjórða sigurin á rað er á bronsuplássi, nú meistararnir fara at fyrireika seg at fara til Finnlands at spæla í europeisku meistarakappingini.

Øll málini vórðu skorað í seinna hálvleiki, og tað var EB/Streymur, sum legði seg framum, tá ið Petur Zachariasen eftir innlegg frá Hans Paula Samuelsen setti bóltin í málið.

Tá var ein tími farin, og sjey minuttir seinni eydnaðist tað Víkingi at vinna úrtøku úr trýstinum, sum heimaliðið legði á gestirnar, eftir at EB/Streymur hevði lagt seg framum.

Tað var eftir horna, at Gunnar Vatnhamar stútaði bóltin í málið.

Tíggju minuttir undan leikloki var tað Philip Djordjevic, sum var bæði arkitektur og málskjútti eftir skjótt Víkinga álop. So royndi EB/Streymur at spenna álopsbogan, og hann brast, tá ið innskifti Adeshina eftir einmansavrik staðfesti 3-1 sigurin.

Harvið hava Sigfríður Clementsen og Víkingur vunnið fýra dystir og harvið tólv stig á rað."

TRÝST á PÍLIN undir MYNDINI, og hoyr frá FM1:

1) Hoyr frásøgnina hjá Hilmari Jan Hansen á FM1 av teimum fýra málunum, ið komu í dystinum millum Víking og EB/Streym.

2) Hoyr samrøðuna Hilmar Jan Hansen gjørdi við Hanus Jacobsen hjá Víkingi og Hans Paula Samuelsen hjá EB/Streymi.

Fyri Hanus Jacobsen og liðfelagarnar var tað týdningarmikið at enda fyrru hálvu væl, ikki minst sæð í ljósinum av, at teir skulu spæla minst fýra dystir í evropeiskum kappingum nú.

Hans Pauli Samuelsen heldur ikki, at 17 stig er nøktandi fyri EB/Streym aftaná 16 dystir. Har eru framvegis nakrir lutir at arbeiða við, staðfestir Hans Pauli Samuelsen. 

Víkingur – EB/Streymur 3-1 (0-0)

0-1: Petur Zachariasen 59.

1-1: Gunnar Vatnhamar 68.

2-1: Philip Djordjevic 81.

3-1: Adeshina Lawal 94.