Í nátt fór ein lyktapeli í Árnafirði, og tá pelin fall, slóknaðu allir lyktapelarnir fram við vegnum.
- Vit fingu hesa fráboðan um 02-tíðina í nátt, og átaksleiðarin hjá Klaksvíkar kommunu varð boðsendur.
Tað visti vaktleiðarin á løgreglustøðini í Havn at siga í morgun.
Í dag er væl av vindi um landið, men veðurforsagnirnar til í morgin eru upp aftur verri, tí tá sigur hann vind upp í ódnarstyrki.
Sambært veðurforsagnunum verður hetta eftir øllum at døma ein vika við illveðri - meginpartin av vikuni.
Føroya Politi heitir á fólk um at tryggja, at leysir lutir og tilfar, sum kann vera til ampa, verður tikið upp ella tryggjað á staðnum.
Kommunur og sløkkilið um landið hava eisini somu áheitan - um at taka upp tað leysa, sum liggur og sløðist.
Vaktleiðarin visti í morgun at siga, at í illveðrinum herfyri var tað í onkrum føri leyst tilfar, sum feyk á hús og gjørdi skaða.
