Í summar, tann 1. juli, vóru tvey ár liðin síðani nýggja fjarskiftislógin kom í gildi. Hon hevði við sær, at nú var brádliga pláss fyri øðrum útbjóðarum á marknaðinum, um enn útlitini í fyrsta umfari kundi tykjast eitt sindur langsiktað.
Tann 1. apríl í ár fekk Føroya Tele »loyvi« frá fjarskifitseftirlitinum, og síðani tá hava fleiri fyritøkur fingið loyvir av ymsum slag.
Tí kann væntast, at kappingin kemur skjótari enn vit høvdu væntað, og Føroya Tele brýggjar seg um.
Úlvurin kemur
Í seinastu útgávuni av Krossfeltinum tekur stjórin Andras Róin samanum tað sum farið er fram síðani 1. apríl og har staðfestir hann, at nú er Føroya Tele ikki einsamalt á marknaðinum longur.
Hann vísir á, at Føroya Tele aftaná drúgvar samráðingar fekk loyvi í apríl, men longu fáar vikur seinni fingu fleiri aðrar fyritøkur loyvi at leggja, hava í hendi og reka fjarskiftiskervi.
Og tað er hetta síðsta, sum er fallið stjóranum í Føroya Tele fyri brósti.
Hann sigur:
»Vanligt hevur annars verið í okkara grannalondum, at hetta síðst nevnda økið er tað, sum seinast hevur fingið kapping. Yvirhøvur kann sigast, at myndugleikarnir í stóran mun hava »givið skarvin yvir«, soleiðis at teir í staðin fyri at gera eitt grundarlag fyri kapping á fjarskiftismarknaðinum, herundir grundarlag fyri samtrafikkavtalum og veitingarskyldu, hava valt at geva 6-7 fyritøkum konsessión og so vóna, at hesar megna at avtala spælireglurnar.«
Óttast ikki
kapping, men ...
Og hann staðfestir, at tað má Føroya Tele so royna.
Tí staðfestir hann, at nú eru úlvarnir komnir og hóast summir teirra eru lítlir og fittir, so ýla teir, bíta og renna skjótt, og tað er hetta, sum Føroya Tele kann fáa tungt at venja seg við.
Tað, sum skilst á útsøgn stjórans er, at hann er ikki heilt nøgdur við at myndugleikarnir hava givið øðrum fyritøkum loyvi til at seta upp egin net og rætt at reka slík.
Hetta er ikki sami framferðarháttur, sum brúktur er í grannalondum okkara, har liberaliseringin er farin meira varisliga fram, og er heldur ikki í tráð við tær fyrstu politisku fráboðaninar, sum komu eftir at lógin varð sett í gildi.
Tá varð lagt upp til, at Føroya Tele fór at vera tað einasta fyritøka, sum fyrstu tíðina kundi hava net, men soleiðis er eftir øllum at døma ikki longur.
Skulu renna skjótari
Í greinini sigur Andras Róin, at tey á Føroya Tele vilja gera sítt ítarsta fyri at varðveita tann týðandi leiklutin sum Føroya Tele hevur á marknaðinum.
? Skal hetta eydnast okkum er neyugt, eru framhaldandi príslækkingar neyðugar, betringar av okkara tænastustigi og útboði og skjótari avgreiðsla neyðugar fortreytir. Óivað skulu vit eisini renna skjótari og arbeiða meira effektivt, eins og rationaliseringsmøguleikar skulu nýtast - ein síðuvinningur kann so vera, at arbeiðið verður stuttligari og meira nøktandi, skrivar Andras Róin í seinastu útgávuni av Krossfeltinum
