- Hetta kann fáa álvarsligar avleiðingar fyri trygdina á sjónum, at Fiskimálaráðið skal spara.
Tað viðgongur Jacob Vestergaard, landsstýrismaður í Fíggjarmálum.
Nú Løgtingið viðgerð fíggjarlógina fyri næsta ár, hevur Fíggjarnevndin spurt landssýrismannin, hvørjar avleiðingar ætlaðu sparingarnar kunnu fáa fyri fiskiveiðieftirlitið og fyri trygdina á sjónum.
Jacob Vestergaard sigur, at Fiskimálaráðið skal spara 8,6 milliónir næsta ár.
Í ár siglur Brimil í 46 vikur og Tjaldrið siglur í 23 vikur og eftir ætlan verður siglingin tann sama næsta ár.
Men verður oljan dýrari, verður vikutalið ikki skert, men virksemið verður avmarkað, tær vikurnar, skipini eru í sigling.
Samstundis ásannar Jacob Vestergaard, at sparingar hesi seinastu árini hevur ført við sær, at eftirlitið er munandi skert.
Landsstýrismaðurin ásannar eisini, at tá ið bara eina skipið er í sigling stóran part av árinum, er greitt, at trygdin er ikki tann sama.
- Fyri trygdina á sjónum kann hetta fáa álvarsligar avleiðingar, sigur Jacob Vestergaard.
Hann vísir á, at siglingin við stórum ferðamannaskipum, og øðrum skipum, er nógv økt.
- Sannlíkindini fyri eini stórari vanlukku, sum kann samaberast við vanlukkuna, tá ið Costa Concordia fór á land, er alsamt vaksandi.
- Hendir ein slík valukka á okkara leiðum, eru vit ikki tilbúgvin at loysa eina slíka uppgávu, ásannar landsstýrismaðurin í fiskivinnumálum.
Hann leggur afturat, at Tjaldrið er gamalt og átti langt síðani at verið skift út við eitt nýmótans skip við betri bjargingarútgerð.
