Venjarin hjá Manchester City, Roberto Mancini sigur, at tað er sera týdningarmikið, at spælarnir ikki spara uppá kaloriurnar áðrenn teir skulu spæla dyst. Tí hevur hann heitt á sínar spælarar, um at drekka eitt glas av víni, dagin fyri teir skulu spæla dyst. Hetta skrivar enska blaðið, Daily Star.
- Maturin ein etur, áðrenn ein dyst er eisini týdningarmikil, slær Roberto Mancini fast. - Spælarnir hava tørv á at eta pitsa, høsnarunga og karbohydratir. Men hetta hevur ikki verið loyvt teimum áður, staðfestir Roberto Mancini.
Teir flestu venjarnir í Premier League, sum t.d. Arsene Wenger hjá Arsenal og Harry Redknapp hjá Tottenham hava bannað sínum spælarum at drekka alkohol, áðrenn dystir.
Í Tottenham er tað ikki loyvt at nema alkohol 48 tímar áðrenn ein dyst í Premier League, og Arsene Wenger hevur innført eitt fullkomið alkoholbann í Arsenal.
Arsene Wenger krevur eisini, at spælarnir hjá Arsenal lata urinroyndir, so hann kann vissa sær, at teir ikki nerta alkohol.
