Hóast tíðindi fyri fimmti árum síðani ikki bórust kring heimin eins skjótt og í dag – og hóast uttanlandstíðindi ikki vóru vanligar høvuðssøgur á føroyskum blaðforsíðum, so hevði Sosialurin leygarmorgunin 23. november í 1963 eina rættiliga aktuella forsíðusøgu, sum fekk glómur í eyguni á fleiri lesarum hendan dagin. Tí Kennedy-morðið var høvuðssøga hendan morgunin.
TRÝST HER fyri at lesa forsíðuna á Sosialinum 23. november í 1963
Søgan er tann, at meðan Tummas Jensen, prentari úr Fuglafirði, hetta fríggjakvøldið skuldi koyra leygardagsblaðið, sum tá var fýra blaðsíður, í pressuna, bórust tíðindi um Kennedy-morðið í øllum heimsins útvørpum.
Morðið fór fram í Texas klokkan 12:30 – sum er klokkan 18:30 okkara tíð – og tey rukku eisini til okkara Útvarp Føroya, sum tá sendi frá klokkan 18:30 á kvøldi til klokkan 20.
Hóast Finnbogi Isaksen, sum hetta kvøldið ikki fekk tíðindi um morðið við í tíðindasendingina klokkan 18:30, so fekk útvarpið kortini tíðindi út, áðrenn teir góvust um áttatíðina hetta kvøldið.
– Eg minnist væl, at Finnbogi hevði tíðindini hetta kvøldið. Men Lias í Rættará var ikki farin heim. Útvarpið hevði nógvar góðar vinir kring landið, sum lurtaðu eftir øðrum útlendskum útvarpsrásum, tveir teirra vóru Petur Háberg og Ludvík Breckmann, sigur Marius Rein, sum tá var á vakt sum teknikari í útvarpinum.
– Eg haldi ikki, at eg fari skeivur, tá eg sigi, at tað var Ludvík, sum ringdi hetta kvøldið og spurdi, um vit høvdu hoyrt, at Kennedy var skotin. Hann hevði lurtað eftir Voice of America og hoyrt tíðindini har. Vit fingu so tíðindini út um, at hann var skotin, men eg haldi ikki at vit fingu við, at hann var deyður. Vit høvdu so ikki eykasending tað kvøldið, sigur Marius Rein.
Men Tummas Jensen, prentaði, steðgaði prenstmaskinuni hjá Sosialinum, sum tá húsaðist á horninum Heygsbreyt/Sjúrðargøta í Havn. Hann fekk fatur á fólki at skriva, og so varð nýggj forsíða skrivað. Vanligt var ikki við myndum í føroyskum bløðum tá, tí fyri at prenta myndir, skuldi klisje'ir gerast, og tær kundu ikki gerast á prentsmiðjuni hjá Sosialinum. Men blaðið fekk javnan klisje'ir niðri frá, og eina klisje av Kennedy átti blaðið.
Men tað vóru ikki øll í Føroyum, sum høvdu hoyrt tíðindini um Kennedy-morðið – og tí vóru tey fleiri, sum fingu hesa heimssensasjón at vita í Sosialinum hendan morgunin.
