Tað var í gjár, at boðað var frá grind í Kalsoyarfirði. Bátar vóru skjótt á staðnum, men grindin slapp. Eina skipið hjá felagsskapinum Sea Shepherd var eisini í økinum saman við tveimum skjóttgangandi bátum hjá felagsskapinum. Løgreglan legði hald á eina bátin, og handtók manningina umborð, eina kvinnu og ein mann.
Leiðarin fyri Sea Shepherd, Paul Watson, var sera virkin meðan raksturin var, og vildi millum annað vera við, at danska verjuskipið, Triton, ikki gjørdi nakað, tá ein føroyskur bátur royndi at steðga Sam Simon við at blaka ein enda um skrúvuna á skipinum.
In.fo hevur í dag tosað við Andras Marr Poulsen, ið er varapolitiinspektørur, fyri at vita um Sea Shepherd hevur meldað tilburðin. Málið er ikki meldað, men Andras Marr Poulsen upplýsir, at løgreglan hevur av egnum eintingum valt at kanna málið nærri.
- Tað er ein partur av kanningararbeiðinum, ið vit nú gera. Um søgan er sonn, so hevur man sett lívið hjá øðrum í vanda, og í tílíkum førum kann løgreglan sjálv taka eitt mál upp.
Andrass Marr Poulsen vísir á, at talan kann vera um brot á §252 í straffilógini, ið staðfestir at:
- Med fængsel indtil 8 år straffes den, der for vindings skyld, af grov kådhed eller på lignende hensynsløs måde volder nærliggende fare for nogens liv eller førlighed.
