Krígssavnið í Vágum hevur í morgun lagt fram stóra útbyggingarætlan.
Savnið hevur, í samráð við WestTech í Sørvági og Fuglark í Klaksvík, fyrireikað eina stóra útbyggingarætlan fyri bygningarnar, ið standa oman fyri landsvegin við Vága Floghavn.
Talan er um grøna bygningin, sonevnda SOR-bygningin, og tornið við síðuna av.
Ætlanin er at byggja eina høll oman yvir SOR-bygningin, og savna alt tilfarið hjá Krígssavninum her. Skitsuprojektið hevur íblástur úr søguligum søvnum uttanlands.
Talan er um eina útbyggingarætlan fyri tilsamans 32 milliónir krónur. Enn manglar fíggingin tó at koma upp á pláss.
Karl Johan Nielsen, formaður fyri Krígssavnið í Vágum, sigur seg hava góðar vónir um, at tað eisini eydnast at fáa fíggingina uppá pláss.
- Men tað er greitt, at arbeiðið fer ikki í gongd, áðrenn fíggingin er komin upp á pláss, sigur Karl Johan Nielsen.
