Sum er, liggja tey trý bestu kvinnuliðini púra jøvn í stigum, men tey hava ikki spælt líka nógvar dystir, so tí er javnstøðan teirra millum bara fyribils. Neistin hevur spælt 21 dystir, Tjaldur 20 og Stjørnan 19.
Um alt hevði gingist eftir ætlan mikukvøldið, hevði Stjørnan spælt í Vestmanna ímóti VÍF, men av tí at veðrið var so vánaligt, fingu klaksvíkskvinnur útsett dystin, tí tær hættaðu sær ikki at koyra til Vestmanna. Nú hevur Hondbóltssambandið so ásett dystin at verða spældan mikukvøldið 6. apríl klokkan 19.45. Tað merkir, at Stjørnan til ta tíð kemur at hanga eitt sindur aftan fyri hini bæði, orsakað av írestandi dystinum.
Greiður grannasigur
Dysturin á Hálsi í Havn varð tó ikki darvaður av veðrinum mikukvøldið, tí her var talan um uppgerð millum grannarnar, Kyndil og Neistan, men hesa ferð eydnaðist ikki Kyndli at arga grannarnar, sum onkuntíð fyrr í vetur.
Beinanvegin fóru kvinnurnar hjá Neistanum avstað frá Kyndli, og sum dystinum leið, var ongantíð nakar ivi um vinnaran. Neistin vann 30-19, eftir 16-9 í hálvleikinum. Hjá Kyndli skutu Heidi Maria Akselsen og Anja Heinadóttir fýra mál í part, og hjá Neistanum var Barbara Brauer toppskjútti við níggju málum og Birita Wardum skjeyt fimm.
Hesa ferð var klassamunur á liðunum, og Neistin hevur eisini síðstu dystirnar spælt so mikið sannførandi, at trúgvin upp á eitt finalupláss er við at koma afturíaftur.
Uttan Anniku
Um tað eydnast ella ikki, verður komandi dysturin hjá Neistanum sera avgerandi fyri, tí hann verður sunnudagin á heimavølli ímóti Tjaldri. Hetta er ein dystur, Neistin ikki hevur ráð til at tapa, tí nú kappingin nærkast endanum, kunnu innanhýsis uppgerðirnar millum oddaliðini fáa alt at siga.
Tjaldur, sum týskvøldið vann greitt á StÍF, skal møguliga klára seg uttan Anniku Thomsen í restini av hesum kappingarárinum, tí hon í tí dystinum meiddi sær hondina. Cornelia Rimbu er farin av landinum, so á pappírinum sær Tjaldurs-liðið viknað út, men ímóti Neistanum kann so ein ábending koma um, hvussu tað verður við hesum endaspurtinum.
Stjørnan, sum er triðja av oddaliðunum, skal í morgin spæla á heimavølli ímóti Kyndli, og har má roknast við, at Stjørnan livir upp til tað, ið kann væntast – ikki minst, nú spælararnir eru svangir, eftir at eingin dystir bleiv mikukvøldið. Triði dysturin verður í Vági sunnudagin, har VB tekur ímóti VÍF.
