Gásadalur: Í bygdini høvdu 18 fólk valrætt, og tá úrslitið av valinum í Gásadali varð almannakunngjørt kl. 20:42 vísti tað seg, at øll 18 høvdu verið á vali.
- Vit vita ikki altíð, hvussu nógv fólk koma á val. Onkutíð sita vit bert og bíða eftir teimum seinastu veljarunum líka til kl. 8.
- Og onkutíð greiða tey heldur ikki atkvøðu, sigur formaðurin í valstýrinum, Dávur Joensen.
Leygardagin var kortini øðrvísi, har øll 18 vóru á vali.
Tá Sosialurin vitjaði valstaðið í Gamla Skúla seinnapartin høvdu 9 fólk verið á vali. Og júst meðan vit vóru har, kom tann tíggjundi at velja.
- Eg havi valt Fólkaflokkin - Jørgin, segði Karl Mikkelsen.
Tað sama høvdu tey flestu av bygdarfólkum hansara eisini gjørt. Av teimum 13 atkvøðunum til flokkin átti formaðurin í flokkinum tær 12.
Hinar atkvøðurnar býttu seg soleiðis: Tjóðveldi fekk tríggjar, meðan Javnaðarflokkurin og Sjálvstýrisflokkurin fingu hvør sína. Tað var ein meiri enn við valið í 2004.
Sambandsflokkurin, Miðflokkurin og Miðnámsflokkurin eiga framvegis ongan góðan í Gásadali.
