Alsamt fleiri, ið smugla rúsevni til Grønlands taka stórar kjansir, tá tey ferðast við rúsevnum í búkinum.
Higartil hevur løgreglan skrásett 33 fólk fyri at smugla rúsevni á hendan vandafulla hátt. Tvey teirra eru deyð.
Tað upplýsir løgreglan í Grønlandi í tíðindaskrivi.
Talið av smuglarum við rúsevnum í búkinum er meira enn tvífaldað í mun til 2021.
Syrgiligt og dapurt, sigur varaløgregluovastin Johan Westen um gongdina.
– Hetta er ikki ein høvuðsstaðartrupulleiki, tí vit síggja, at smuglarar hava ferðaseðlar til alla strondina. So vit kunnu rokna út, at hetta ávirkar alt landið og økir um misnýtslutrupulleikarnar, sum vit longu stríðast við kring alt Grønland, sigur hann í tíðindaskrivinum.
Í juni doyði ein 33 ára gamal maður í einum flogfari úr Keypmannahavn til Kangerlussuaq.
Rúsevnini, sum hann hevði svølgt, var ikki nóg væl pakkað inn, og tí lak evnið út í kroppin hjá manninum, hevur løgreglan upplýst.
Ein obduktión vísti, at stórar nøgdir av narkotika vóru í magasekkinum.
Eftir dramatisku hendingina á flogfarinum hjá Air Greenland var tilboð um kreppuhjálp til tey ferðandi, hevur blaðið Sermitsiaq áður skrivað.
Nakrir rúsevnissmuglarar við kós norðureftir verða avdúkaðir í Kastrup.
Í apríl vísti ein kanning av einum manni í tríatiárunum, at hann hevði svølgd 47 smáar pakkar við hassji.
Einar tvær ferðir áður í summar hevur grønlendska løgreglan sent út ávaring um stóra vandan, ið rúsevnissmuglarar seta seg í.
Ikki eru øll, sum lurta. Tí fyri kortum eru fimm dømi, har fólk eru avdúkað fyri at smugla á henda vandafulla hátt, upplýsir løgreglan í dag.
/ritzau/
