Liverpool vann í kvøld 2-1 á Sunderland og heldur lív í vónini um fyrsta Premier League heitið í søguni. Steven Gerrard og Daniel Sturridge løgdu Liverpool á odda, men í seinna hálvleiki mundi Liverpool tveitt leiðsluna vekk.
Steven Gerrard fær hol á
Brendan Rodgers hevði aftur Raheem Sterling á bonkinum, meðan Joe Allen og Coutinho fingu afturval. Spælið var á góðari leið í fyrra hálvleiki, men tað gekk illa við at koma fram til stórar møguleikar.
Stutt fyri hálvleik kom tó hol á, tá Steven Gerrard sendi eitt fríspark í málið. Luis Suarez spældi ein minni góðan dyst, men var upphavið til frísparkið. Bara tríggjar minuttir inn í seinna hálvleik tótkist Daniel Sturridge at avgera dystin, tá hann sendi bóltin í málhornið.
Útskiftingar gjørdu mun
Sunderland skifti út og tað hjálpti. Teir trýstu eitt ókonsentrera Liverpool lið og fingu minkað um munin eitt korter fyri tíð. Innskifti Ki Sung-Yueng kom at standa púra leysur eftir hornaspark og skoraði.
Við einum høpileysum Glen Johnson á høgra bakki var Liverpool um at missa alt á gólvið. Høgri bakkurin hjá Liverpool var greitt vánaligasti maður á vøllinum. Fyri uttan onkran einkult stutta avlevering, so riggaði einki, sum hann royndi.
Sunderland megnaði tó ikki at umseta trýstið til mál. Liverpool hevði fleiri góðar støður í hinum endanum, men tað var sjáldan at tað bleiv vandamikið.
Liverpool liggur nú nummar tvey við 68 stigum. Chelsea hevur 69, meðan Manchester City hevur 66 stig á triðja plássi, men hevur spælt tveir dystir færri.
Premier League í dag:
Liverpool – Sunderland 2-1 (1-0)
1-0 Steven Gerrard, 39
2-0 Daniel Sturridge, 48
3-0 Ki Sung-Yueng, 76
West Ham – Hull 2-1 (1-0)
1-0 Mark Noble, 24 br
1-1 Nikica Jelavic, 48
2-1 James Chester, 54 sjálvmál
