Jana Mittún og liðfelagarnir í Viborg spældu hóskvøldið torføran útidyst í bólki 2 í ovara endaspælinum í bestu donsku hondbóltsdeildini.
Dysturin var á útivølli móti verandi meistarunum, Esbjerg. Esbjerg vann ein greiðan 35-27 sigur á Viborg. Í steðginum var heimaliðið á odda 17-11.
Jana skoraði eitt mál upp á seks málroyndir, og hon legði upp til tvey mál (assist). Jana vann eisini liðnum eitt brotskast.
Esbjerg er fremst í bólki 2 við seks stigum. Ikast-Herning hevur fimm stig, og Viborg og Sønderjyske eru við ongum stigi aftast í bólkinum.
Komandi týsdag klokkan 17.30 spælir Viborg dyst á útivølli móti Sønderjyske.
Í niðurflytingarbólkinum vóru Súna K. Hansen og liðfelagarnir í Skanderborg eisini fyri stórtapi.
Skanderborg tapti á útivølli 24-35 fyri Silkeborg-Voel. Í steðginum var heimaliðið frammanfyri 19-13.
Súna skoraði eitt mál upp á tríggjar málroyndir.
Skanderborg er aftast í niðurflytingarbólkinum við einum stigi. Silkeborg-Voel er fremst við átta stigum, og Bjerringbro hevur fýra stig. EH Aalborg hevur trý stig, og liðið hjá Rakul Wardum, Ringkøbing hevur tvey stig.
4. mai spælir Skanderborg dyst á útivølli móti EH Aalborg.
