Fyri fyrstu ferð nakrantíð fáa teir liberalu demokratarnir í Bretlandi størri undirtøku enn arbeiðaraflokkurin og tann konservativi flokkurin. Tað fær politiskar eygleiðarar at tosa um, at kanska er ein nýggj tíð á veg í bretskum politikki.
Sambært einari meiningakanning hjá blaðnum Mail on Sunday høvdu teir liberalu demokratarnir fingið 32 prosent av atkvøðunum, um val var nú. Tað er heili 12 prosenmtstig meiri enn í seinastu kanning.
Tann konservativi flokkurin hevði sambært kanningini hjá Mail on Sunday fingið 31 prosent av atkvøðunum og arbeiðaraflokkurin hevði fingið 28 prosent. Kanningin vísir, at tað er serliga tann konservativi flokkurin, sum missir veljarar til liberaldemokratarnar.
Valið í Bretlandi verður tann 6. mai.
