Leicester við jólagávu til Liverpool

Nýggjársumfarið í Premier League, sum er tað 17. umfarið í landskappingini, byrjaði í kvøld. Liverpool vann 2-1 á Leicester, sum annars skoraði øll trý málini í dystinum. Eisini vann Brentford á kreppurakta West Ham.

Leicester City tapti greitt á heimavøll í stóra jólaumfarinum móti Newcastle. Tí vóru vónirnar nokk ikki tær størstu undan dystinum á Anfield móti Liverpool, men tað er eisini ein sannroynd, at Leicester stendur seg væl í útidystunum móti teimum sterku, tí skjótálopini eru sterka vápni.

Tað skuldi vísa seg longu aftaná fýra minuttir, tá Kiernan Dewsbury-Hall púra ótarnaður rann gjøgnum verjuna hjá Liverpool og skoraði. Eftir hetta var Leicester helst betra liðið á vøllinum.

Viðhaldsfólkini hjá Liverpool fingu eina jólagávu, tá felagið keypti Cody Gakpo frá PSV. Hann sat á áskoðaraplássunum og kundi síggja Alex Oxlade-Chamberlain nærmast geva nýggja keypinum plássið á vinstra vongi, so lítið hann gav liðnum. Tá Liverpool mest hevði brúk fyri tíð, so kom ein jólagáva frá einum óvæntaðum jólamanni. Hann eitur Wout Faes og spælir í miðverjuni hjá Leicester. Beint fyri hálvleik endaði hann við at senda ein vandaleyst inn frá Liverpool í egið mál.

Sum um at tað ikki var nokk, so endurtók hann bragdið í seinna hálvleiki. Hesa ferð rakti Darwin Nunez stongina og Wout Faes megnaði ikki at skipa føturnar, áðrenn hann sendi bóltin í egið net fyri aðru ferð.

Liverpool kundi havt sett punktum nakrar ferðir, men tað hevði ikki verið órættvíst, um Leicester - við fyrrverandi venjaranum hjá Liverpool, Brendan Rodgers, við róðið – vann sær ein javnleik.

West Ham er í kreppu. Í kvøld tapti liðið 2-0 á heimavølli móti Brentford. West Ham er nú eitt stig frá niðurflytingarstrikuni og allir kappingarneytarnir spæla í morgin.