Klumman
Aðrastaðni á hesum síðum lýsa vit málið um dystarbannið, sum venjarin hjá Víkingi fekk handað fríggjadagin.
Úrslitið av viðgerðini varð, at talan gjørdist um tann eina dystin, sum venjarin fekk uttanfyri gyrðingina, og tað í sjálvum sær er merkisvert, um hetta verður hildið saman við teimum revsingum, sum annars eru og verða givnar fyri líknandi brot.
Tað er skjótt, at tankarnir leita móti minni penum orðum um málsviðgerðina, sum á fleiri økjum tykist heldur lunkað og huldukend. Í øllum førum kunnu vit staðfesta, at var brotið framt av spælara, so kundi tann eini dagurin bert komið upp á tal, um spælarin var provokeraður, áðrenn fingurin varð hildin á lofti.
Kappingarnevndin hevur tó tulkað reglurnar øðrvísi, og tað hevur nevndin fyri sovítt eisini fullan rætt til.
Men tað vildi verið upp á sítt pláss, um grundgevingarnar fyri hesum vórðu lagdar á borðið. Ikki bara í hesum førinum – men eisini í øllum øðrum førum, har leikbann verður givið. Tá kundi almenningurin sæð grundgevingina fyri, hvussu brotið er sektað, og hví dystarbannið ikki var longri ella styttri enn tað sama.
Fótbóltssambandið skal minnast til, at fótbólturin virkar í egnum lógarverki, har tey at kalla eru uttan fyri lóg og rætt hjá samfelagnum annars.
Hetta setir krøv til opinleika og gjøgnumskygni, men dømini eru nógv, har opinleiki og gjøgnumskygni um málsviðgerð og avgerðir eru fyribrigdi, ið eru trupul at fáa eyga á.
Tá FSF samstundis hevur eina skipan, har allar avgerðir hjá Aga- og yvirkærunevnd verða almannakunngjørdar á heimasíðuni hjá FSF, so skuldi hetta verið so líkatil. Um tað er krav, at nakrar avgerðir um leikbann skulu almannakunngerast, samstundis sum sama krav ikki er galdandi fyri onnur leikbann, so er í øllum førum okkurt ravruskandi galið við skipanini.
Og skuldi nakar ivast, so var tað ein peikifingur, sum í hesum førinum varð rættur móti FSF ;)
