– Vit eru ótrúliga fegin um tann stuðul, Lions Club hevur givið okkum, og okkara ætlan er, at pengarnir skulu brúkast til betri útgerð tá ið tey skulu fáa tekst lisnan fyri sær ella skrivaðan fyri seg.
Tað sigur Anne-Karin Kjeld, forkvinna í Felagnum fyri Lesi- og Skriviveik, sum tók ímóti teimum 55.000 krónunum, stórsteypadystirnir í hondbólti og fótbólti kastaðu av sær. Hetta vóru pengarnir fyri stórsteypadystirnar undan síðsta kappingarári, ið høvi nú var at handað felagnum.
Felagið fyri Lesi- og Skriviveik hevur næsta ár 20 ár á baki, og tað varð sett á stovn av foreldrum, einamest mammum, sum áttu børn, ið høvdu trupulleikar við at lesa og skriva. Tá ið felagið varð sett á stovn, høvdu hesi foreldrini í longri tíð, hvør í sínum lagi, roynt at hjálpt børnum sínum, men takkað veri politiskari vælvild frá ymsum síðum, eru munandi batar hendir.
– Úrslitið er, at í dag hevur felagið eitt slag av einum skúla, har vit eftir besta førimuni fáa hjálpt teimum, ið eru lesi- og skriviveik. Í løtuni hava vit 17 lønt starvsfólk og næstan 60 næmingar, umframt at tað allarmesta av okkara virksemi er sjálvboðið arbeiði, sigur Anne-Karin Kjeld. Men hon harmast um, at vanliga skúlaskipanin ikki megnar at loysa trupulleikarnar, lesi- og skriviveik hava at dragast við.
– Ikki tí, vit hava í Føroyum nógvar fantastiskar lærarar og góðar umstøður, men sjálvt skúlaverkið megnar ikki uppgávuna. Føroyski skúlin er fyri alla ta miðalgóðu breiddina av skúlanæmingum, men tá ið tað kemur til teir bestu næmingarnar og teir, ið eru ringast fyri, er ringt hjá teimum at fáa hjálp. Tí er tað, at vit sum felag royna at røkka, har skúlin tíverri hevur ilt við at røkkur í dag.
Tey, ið leita sær hjálp hjá Felagnum fyri Lesi- og Skriviveik, eru ikki bara børn í skúlaaldri, men fólk úr øllum samfelagsløgum – skiparar, lærarar, sjúkrasystrar, elektrikarar og mong onnur – eru fevnd av skipanini, felagið hevur bygt upp í skjótt 20 ár.
– Okkara “næmingar” fevna eisin í fleiri aldursbólkum, tí tann yngsti er níggju ára gamal og tann elsti táttar í tey trýss.
