Hvussu vilt tú lýsa fyrsta undankappingina við Lars?
Eg haldi, at tað hevur verið positivt. Vit høvdu ein venjara áðrenn, sum æt Brian Kerr. Hann gjørdi tað eisini gott, men vit samdust ikki um at leingja sáttmálan, so vit máttu finna ein nýggjan. Vit høvdu evnir í Finnlandi, Svøríki, Onglandi og Hollandi, men tað er ikki nøkur løtt uppgáva at finna ein landsliðsvenjara. So peikaði onkur á Lars Olsen fyri okkum. Hann hevði einki starv tá. Vit settu okkum í samband við hann, og tað gekk skjótt at fáa ein sáttmála í lag við rímiligum treytum. Vit forhoyrdu okkum eisini í hansara umhvøri, tosaðu við danska fótbóltssambandi, fyrrverandi arbeiðsgevarar hjá honum og fingu heilt ómetaliga positiv viðmæli. Hann er ein kendur persónur, hevur vant feløg í Superliguni, verið á landsliðnum og hevur drúgvar royndir. Lars Olsen hevur ein øðrvísi stíl enn Brian Kerr. Hann er ikki so opin ella útvendur sum Brian Kerr, men hóast hetta, er hann kendur fyri at vera markantur og geva ordrar.
Um vit síggja burtur frá dystinum í Eysturríki, so kunnu úrslitini góðtakast. Tapini eru minni enn tey hava verið, men eg hyggi eisini eftir hvussu vit spæla. Har haldi eg, at tað hevur verið positivt. Tí taki eg ikki undir við, at tað ikki hevur verið nóg gott undir Lars Olsen. Hann hevur eisini skapt ein øktan áhuga fyri fótbóltinum. Tað eru fleiri áskoðarar og hyggja eftir landsliðnum undir Lars Olsen. Eg skal ikki siga, at tað ikki hevði hent undir Brian Kerr, men Lars Olsen hevur havt munandi fleiri áskoðarar til heimadystirnar enn tað hava verið seinastu mongu árini. Miðaltalið hjá Lars Olsen er upp í móti 4000 áskoðarum, so eg haldi eisini at tað er skeivt at siga, at áhugin skal vera fallandi.
Merkja tit, at Lars Olsen er markantur og gevur ordrar?
Eg havi ikki við hópin at gera dagliga, men eg havi kenslu av, at hann hevur sett seg í respekt. Hann er ein annar persónur enn Brian Kerr. Hann er meiri systematiskur og hugsar strategiskt. Vit kravdu eisini, at Lars Olsen fekk ein føroyskan hjálparvenjara. Brian Kerr hevði ein útlendskan hjálparvenjara, og tað var nógv tosað um, at tað var so lítið samband millum Brian Kerr, hjálparvenjaran og heimafrontin. So Lars Olsen fekk ein bundna uppgávu í at velja ein hjálparvenjara. Hann fekk eini fimm nøvn, sum vit hildu vera hóskandi. Hann hevði nakrar samrøður og valdi síðani Jóannes Jacobsen út. Eg haldi, at tað samstarvið hevur riggað fínt.
Landsliðiðshópurin undir Brian Kerr hevði eina forbetrandi gongd, og tað haldi eg eisini ger seg galdandi undir Lars Olsen. Men Lars Olsen fær eina drønharða byrjan og byrjar í einum sera sterkum bólki.
Tað er ein sannroynd, at PR-arbeiðið er vorðin munandi meiri umfatandi og atgongumerkini bíligari. Hongur tað ikki saman við, at áskoðaratalið er hægri nú?
Jú, tað ger tað. Men tað hongur eisini saman við úrslitini, sum landsliðið skapar. Vit hava eisini fingið ljós á Tórsvøll, sum skapar betri umstøður og so er tað eisini økta marknaðarføringin. Hetta hevur nakað við stabilitet at gera. Fótbóltssambandið hevur verið rættiliga óstøðugt, og ikki havt orku til annað enn at sløkkja eldar. Tað sum eg havi lagt stóran dent á, er at fáa stabilitet í tingini, so vit fáa frið at arbeiða við tí, sum tað snýr seg um, nevniliga fótbóltinum. So hóast eg ikki bara sá positivar síður við Brian Kerr, so ynskti eg at halda fram við tí samstarvinum, tí tað hevði tryggjað stabilitet. Men tað var ikki gjørligt. So fáa vit Lars Olsen, og at arbeiða við honum í bara tvey ár, tað er ov lítið, tí tú skapar einki upp á tvey ár.
Kerr fekk tvey ár, men hann hevur sagt við Sosialin, at hann merkti ikki, at áhugin frá tykkara síðu var so stórur at forseta, og at tit høvdu avloysara kláran beinanvegin. Hvat fært tú sagt um tað?
Vit høvdu ógvuliga langar og drúgvar samráðingar við Brian Kerr. Hesar byrjaðu langt áðrenn, at tað kom fram, at hann fór. Tað vóru torførar samráðingar, sera torførar samráðingar. Og tað var ógvuliga langt í millum okkum fíggjarliga.
Hvussu langt?
Rættiliga langt.
Tú fært ikki sett tal á?
Nei, tað kann eg ikki. Men tað vóru nógvir pengar á muni. Og Brian Kerr var tann fyrsti venjarin hjá okkum, sum var í tí høga lønarflokkinum. Við honum fóru vit upp í ein lønarflokk, sum vit ikki høvdu sæð í Fótbóltssambandinum áðrenn. Og tað var tað fíggjarliga, sum skilti okkum, ikki tað ítróttarliga. Eg helt ikki, at tað var ráðiligt at gera ein avtalu á tí støðinum, sum hann skeyt upp. Men sjálvandi er Lars Olsen ikki ókeypis.
Danskir miðlar vilja vera við, at lønin hjá Lars Olsen liggur um tvær milliónir krónur. Passar tað?
Tað er nakað lægri enn tað.
Hvussu nógv bíligari er Lars Olsen?
Hann er bíligari enn Brian Kerr. Vit fingu Lars Olsen longur niður enn vit fingu Brian Kerr. Men tað er soleiðis, at tá ið tú hevur samráðingar yvir eitt longri tíðarskeið, so kemur tú til eitt punkt, har tú sigur, at nú mást tú taka støðu til, um tú vilt hava eina avtalu ella ikki. Vit komu so til tað punktið, at Brian Kerr fekk eitt ultimatum frá mær. Eg segði við hann, at so langt kann eg strekkja meg og tú mást svara innanfyri tað tíðspunktið.
Í hesari tilgongdini merktu vit, at vit høvdu ein trupulleika. Vit vistu, at samráðingar um dystarskránna fóru at vera í november, og dystur var á skránni í mars, so tá vit sóu hvønn veg tað bar, so høvdu vit antennurnar úti aðrastaðni. Vit førdu ikki samráðingar, men vit høvdu nøkur nøvn, sum vit hugdu at.
Hava tað so verið heilhjartaðar samráðingar frá tykkara síðu?
Ja, tað var tað. Hann fekk eitt heilhjartað tilboð frá mær, um at forseta á einum munandi hægri fíggjarligum støði, enn hann hevði fingið áðrenn. Eg segði við hann eg vóni at tú tekur av, og at tú skilir, at vit ikki kunnu fara longri upp.
Hvussu var samstarvið millum FSF og Brian Kerr?
Tað var eitt gott samstarv. Men hansara persónligheit er øðrvísi samanborið við Lars Olsen. Brian Kerr var ein krevjandi persónur og hevði ein stíl, sum kravdi eina vissa toleransu. Men hann var væl lýddur millum spælararnar og í FSF, so tað skal ikki standa eftir, at hann fór eftir eina ósemju við okkum. Hann fór, tí vit ikki vórðu samdir um ein sáttmála.
Sjálvandi vóru tað nøkur sum søgdu, at hann ikki lat serliga nógv eftir seg og ikki hevði nakað serligt samband við feløgini. Og tað hoyrir eisini við til sannleikan, at hjá okkum var onkur, sum setti spurnartekin við, um tað var rætt at halda fram við Brian Kerr. Men persónliga var eg ikki í iva. Eg ynskti at forseta við honum. Vit høvdu eisini samráðingar frá sumri til oktober. Tíverri gingu samráðingarnar eisini umvegis ein umboðsmann. Vit høvdu nakrar fundir, har vit hittust andlits til andlits, men seinni bleiv alt umvegis ein umboðsmann. Tað hevur kanska gjørt samskiftið truplari.
Men Lars Olsen hevur so bygt víðari upp á tað, sum Brian Kerr byrjaði uppá.
Við Norðlýsið hevur tú sagt, at føroyska landsliðið hevur ikki verið betri enn tað sama. Meinar tú tað?
Eg meini tað, at vit ikki hava sæð landsliðið spælt á henda hátt áður. Teir fara longur fram á vøllin og skapa nakað, tað er ikki so verjukent longur. Og yvirskipað vil eg siga, at úrslitini eru góð. Tú mást minnast til bólkin, sum vit vóru í. Høvdu vit til dømis verið í bólkinum, sum Íslandi var í, so høvdu vit ikki staðið við bara einum stigi í dag, tað kann eg lova tær fyri.
Eg eri ikki nakar fótbóltsserfrøðingur, men eg meti meg sjálvan sum ein vanliga gløggan áskoðara. Fyri mítt viðkomandi kann eg siga, at eg ongantíð havi upplivað landsliðið spælt sum teir gera í dag. Eg havi ofta sitið við kensluni av, at skrædl vóru í væntu. Nú haldi eg hinvegin, at vit ongantíð áður hava fingið so nógv góð og samanhangandi úrslit, tá vit hyggja eftir styrkini hjá mótstøðuliðnum. Og tað eru góðar taktir at hóma. Vit hava eitt gott U21-landslið og góðar ungar spælarar, sum eru ávegis. Tá vit hava sett hetta saman ordiligt, so eri eg sannførdur um, at vit við einum góðum lutakasti koma at skapa sensatiónir áðrenn tú veitst av. Áðrenn tú veit av, so hava vit akkurát líka góðar møguleikar at skapa sensatiónir sum Ísland hevur. Eg skal ikki siga, at vit koma í nakað endaspæl, men tann møguleikin er avgjørt ikki absurdur. Avgjørt ikki.
Kerr hevði eisini sum uppgávu at samskipa ungdómslandsliðsarbeiði, men sambært Virgar Hvidbro, aðalskrivara í FSF, røkti hann ikki hetta arbeiði nøktandi. Hvønn leiklut hevur Lars Olsen har?
Sjálvandi er eitt vist samband millum U21 og A-landsliðið. Ungdómsvenjararnir og landsliðsvenjararin hava eisini fundir. Men tað hevur ikki verið nóg neyvt definerað. Tað sama er galdandi, tá tað kemur til sambandið við feløgini. Hann sigur sjálvur, at hann lítið og einki samband hevur við feløgini. Tað hevur kanska nakað við ein hugburð í Føroyum at gera, sum skal broytast.
Hvat meinar tú við?
Vit eru rættiliga individualistisk í Føroyum. Vit ynskja helst ikki, at fólk úti frá blanda seg í okkara viðurskifti. Vit duga ikki nóg væl at taka í móti. Eingin landsliðsvenjari hjá okkum hevur verið nógv úti í feløgunum.
Men hvør skal taka stig til hetta? Er tað ikki uppgávan hjá landsliðsvenjaranum?
Landsliðsvenjararnir venda aftur til okkum og siga, at tað tykist ikki vera nakar serligur áhugi. Hjá einum landsliðsvenjara, sum kemur úti frá, tekur tað tíð at koma inn. Men organisatoriskt hevur tað helst haltað eitt sindur hjá okkum har, tá vit ikki hava verið nóg greið um, hvussu hetta skal skipast.
Og tí hevur tað ikki riggað optimalt enn.
Men tað er nakað, sum tit arbeiða við?
Ja. Og fyri at tað kann rigga, so mást tú hava stabilitet. Og tú fært ongan venjara inn, sum ger nakran mun, um hann bara er tvey ár, tí hann brúkar tvey ár um at finna út av, hvat Føroyar er fyri nakað.
Fótbóltssambandið kallar ógvuliga ofta inn til tíðindafund. Hví gera tit ikki tað, tá tit leingja við samstarvið við Lars Olsen, sum hevur mest umráðandi venjarastarvið í Føroyum?
Eg meini, at vit høvdu ein tíðindafund.
Tað høvdu tit ikki.
Eg minnist ikki heilt hvussu tað var. Men tað er eitt forsømilsi, tí tað burdu vit havt. Eg haldi eisini, at tað var meiningin, men møguliga er okkurt praktiskt komið fyri. Men tað er rætt, tað burdu vit gjørt. Men tað er altso ikki tí, at vit hava viljað niðurtónað tað ella ikki ynsktu at markera tað. Tað er tað ikki.
Hvat hugsaði tú, tá Lars Olsen kom við sínum útsagnum um kasakstansku spælararnar, sum sambært honum spældu í bestu russisku deildini?
Eg legði ikki merki til tað á tíðindafundinum. Tað er nakað, sum føroyskir journalistar fanga og gera til eitt stórt mál. Eg legði ongan týdning í tað yvirhøvur. Øll kunnu koma til at fortala seg. Hann segði eisini, at Súni Olsen spælir við HB, hóast hann útmerkað veit, at Súni Olsen spælir við B36. Øll kunnu gera feilir.
Men tá hann sigur tað við Útvarpið, Sjónavarpið og Rás2. Hugsar tú ongantíð, at hatta var býtt sagt?
Jú, tað er býtt av einum landsliðsvenjara at siga ting, sum ikki passa. Men har frá og so til at koma til ta niðurstøðuna, at landsliðsvenjarin ikki røkir sítt arbeiði, tað er nokk so langur vegur. Hann er nærlagdur, fylgir væl við og er nógv í Føroyum. Vit hava ikki nakra fatan av, at hann ikki er eldhugaður.
Skilir tú annars, at fólk sakna úrslit og fólk droyma seg aftur til tíðina við Kerr?
Ja, tað skilji eg væl. Men tá eg sigi sum eg geri, so geri eg tað út frá teimum eygleiðingum, sum eg geri mær, tá landsliðið spælir og úrslitini hava verið lutfalsliga góð. Harnæst var fyrr øgiliga stórur munur á úrslitunum á útivølli og heimavølli. Vit hava vanliga tapt stórt á útivølli og klárað okkum so dánt á heimavølli, tað er broytt nú. Nú er minni munur á útivølli og heimavølli. Men eg skilji væl, tá fólk siga, ”harra gud null stig, hvat er tað?” Tað er null og tað er ikki nóg gott. Men har má eg spyrja í mun til hvat? Eg føli meg í øllum førum tryggan við tað, sum eg síggi á vøllinum og hoyra innanfyri her. Tað geri eg.
Men tað er, tá tað standa null stig á kontoini, at tit velja at leingja við Lars Olsen. Tað er tí, at tit kenna tykkum tryggan við hann og eru nøgd við tað, sum hann hevur gjørt?
Ja, tað er tað. Tað er kanska eitt sindur óvanligt, at gera avtaluna so tíðliga, sum vit gjørdu, men vit fingu at vita frá Lars Olsen, at tað mátti henda tá, annars fór hann aðrar vegir. Vanligt er at byrja at samráðast eitt hálvt ár áðrenn, men her byrjaðu vit eitt sindur áðrenn. Hann ynskti at fáa sína framtíð avgreidda og tað er púra vanligt.
Er Lars Olsen nóg eldhugaður í føroyskum fótbólti.
Ja, tað haldi eg, at hann er.
